DILI, STLTIMORLESTE.com – Rental ou fatin servis hadia telefone iha dalan ninin sira iha sidade Díli nian, neebe antes nee ema bele bá hadia deit iha Timor Plaza, Colmera no fatin seluk neebe iha ho folin neebe makaas, daudaun nee laos deit iha fatin sira nee mak ema bele asesu hodi hadia, maibe ho prezensa rental kiik sira neebe iha mak balun nia matan ladun kualidade tanba folin baratu, maibe bele fo fatin bá povu kiik sira neebe ho kbiit natoon bele asesu hotu, hodi hadia sira nia telefone neebe kondisaun aat ho folin neebe sira senti kmaan.
Tuir observasaun diariu nee iha terenu, antes nee rental ka fatin servis bá telefone neebe erru ka kondisaun layar aat, uza nain sira tenke bá hadia iha Timor Plaza, Colmera no fatin seluk maibe ho folin neebe makaas hahu husi US$ 50-60 bá leten, halo ema barak mak dada iis atu hadia fali sira nia telefone. Maibe depois ho rental kiik sira neebe mosu iha sidade Díli, halo ema hotu hahu husi estudante, povu baibain sira bele asesu hotu ba rental telefone kiik sira nee hodi hadia sira nia telefone neebe aat. Tanba folin iha servis Hp kiik sira ho folin neebe baratu hahu husi US$ 10 bá leten. Haree husi folin neebe iha halo ema hotu bele hakat bá fatin nee hodi hadia sira nia Hp neebe aat, liu-liu kona bá layar Hp nian neebe aat bele hadia kedas tanba folin neebe baratu. Folin neebe iha depende bá telfone nia merek, maibe folin ladun dook malu.
Tuir Uza nain telfone Oppo, Zacarias Soares nuudar estudante hatete, kontenti tebes ho rental ka fatin hadia telfone kiik sira iha dalan ninin nee, ajuda tebes povu kiik sira neebe kbiit naton bele asesu hotu mai sira nia fatin, tanba ho folin neebe baratu los. Kompara uluk rental kiik sira nee seidauk iha, ema bá hadia iha Timor Plaza, maibe nee so bá sira neebe iha osan. Tanba hadia iha Plaza nee hahu husi US 50 no US$ 60 bá leten. Agora lae, ho osan US$ 10 too 12 bele mai hadia dadauk ona. Maske ema dehan nee ladun kualidade, maibe bainhira uza ho didiak sasan nee sei dura ho tempu kleur.
“Hau kontenti tebes, tanba agora nee telfone aat la presiza rai kleur too osan US$ 50 foin mai hadia, maibe agora kaer US$ 11 bele mai hadia dadauk ona. Neebe ita bele dehan fatin servis telfone sira neebe iha dalan ninin ajuda tebes povu kiik sira bele lori sira nia telfone mai hadia. Kompara uluk nee, so ema iha osan mak bele bá hadia iha Plaza, ema neebe kbiit naton bainhira telfone aat rai kleur lai depois osan too mak foin bá hadia,” dehan nia bá STL iha Komoro, Kuarta (10/06/2026).
Nia hatutan, kualidade ho ladun kualidade nee fila fali bá ema neebe uza, se wainhira uza ho didiak sasan nee sei dura kleur mak foin at. Maske hadia ho sasan neebe kualidade no lori osan montante boot, maibe se uza la ho diak sasan nee sei aat ho lais. Neebe buat hotu fila fali bá uza nain sasan nee.
Nunee mos uza Nain Celestina Correia nuudar Dona de Casa hatete, fatin servis kiik sira nee halo ema hotu bele mai asesu hodi hadia sira nia telfone neebe aat, liu-liu bá layar neebe iha ganguan, lori deit US$ 12 bele hadia no troka kedas layar ona. Neebe senti bá kman, telfone aat bele mai hadia lalais, la hanesan uluk hein iha osan iha lai mak foin bá hadia iha Plaza, tanba folin baratu hanesan nee seidauk iha.
(dom)
