BAUCAU, STLTIMORLESTE.com – Serimonia lansamentu fatuk dahuluk ba estrada ligasaun Aslaitula ba Viqueque Vila, posibilidade sei lansa iha Edifisiu Ministeriu Obras Publikas (MOP) Nasional.
Prezidente Autoridade Munisipiu Viqueque, Francisco Cruz Simões de Gonzaga Soares aprezenta, tuir planu lansamentu fatuk dahuluk ba estrada refere akontese ona iha fulan Abril tinan nee, maibe planu refere la realiza, tanba mudansa orariu neebe impaktu husi programa avalisaun kondisaun minimas neebe kuaze akontese iha territoriu nasional.
“Nee mundansa eskezul foin lalais sira fo hatene sei lansa deit iha Nasional edifisiu Obras Publikas, maibe ita la hatene bainhira mak bolu Prezidente Autoridade ho APA sira atu akompanha prosesu nee,” hateten Prezidente Autoridade Munisipiu Viqueque, Francisco Cruz Simões de Gonzaga Soares ba STL liu husi telefone, Tersa (02/06/2026).
Nia sublina, serimonia lansamentu fatuk dahuluk nebee atu lansa iha edifisiu Ministeriu Obras Publikas Nasional nee, tanba ho pakote neebe kobre mos estrada diresaun Viqueque Vila ba Postu Administrativu Uatulari, mezmu serimonia lansamentu fatuk dahuluk realiza iha nasional, maibe sei partisipa husi Autoridade Munisipal Viqueque no Autoridade Postu sira husi Munisipiu Viqueque.
Nia fo razaun, prosesu reabilitasaun ba estrada refere liu husi sirimonia lansamentu fatuk dahuluk atu realiza iha Nasional nee, tanba eskezul (schedule) ba estrada refefe tama iha nasional.
“Neebe dehan katak husi Aslaitula too Viqueque nee eskezul uluk kedas planu husi nasional, neebe sei lansa iha nasional. Hanoin tarde liu iha fulan oin,” Francisco argumenta.
Prezidente Autoridade Munisipiu Viqueque nee rekonhese, atualidade estrada ligasaun husi area Aslaitula ba Viqueque Vila no kontinua ba Postu Administrativu Uatulari kondisaun aat, maibe Governu iha komitmentu sei responde no reabilitasaun ba estrada refere atu nunee bele fasilita movimentasaun transporte publiku no privadu inklui fo rendimentu ekonomia ba komunidade agrikultores sira iha baze liu husi asesu merkadu ho kondisaun estrada diak.
Nia komenta, mezmu orariu lansamentu fatuk dahuluk ba estrada refere parte Autoridade Munisipiu seidauk hatene, maibe Autoridade Munisipal nafatin esforsu liu husi koordena ho Ministeriu refere, nunee bele implementa iha tempu badak.
“Hau hanoin tinan ida nee hakarak ga lakohi Aslaitula nee tenke rezolve tiha, tanba nee ami esforsu halo pedidu nafatin atu asegura Aslaitula nee too Viqueque, nunee mos too Uatulari, Uatucarbau ho mos Lacluta,” Francisco hakotu.
(tom)
