FATUMEA, STLTIMORLESTE.com — Autoridade lokal Suku Belulik Leten, Postu Administrativu Fatumea, Munisípiu Covalima, husu Ministru Obras Públikas (MOP), Samuel Marçal, atu kumpri promesa lansa fatuk dahuluk ba reabilitasaun estrada Salele–Fatumea.
Xefe Suku Belulik Leten, Oscar Pereira Amaral, hateten katak estrada husi Salele to’o Fatumea, ne’ebé iha tempu ukun-rasik-an to’o agora seidauk hetan manutensaun adekuada, atualmente nia kondisaun grave tebes.
Nia hateten, kondisaun estrada ne’e la’ós de’it difikulta movimentasaun transporte públiku no privadu, maibé mós afeta transporte ambulánsia sira ne’ebé lori pasiente husi Fatumea ba Suai.
Tuir nia, kondisaun estrada ne’ebé aat no nakonu ho kuak aumenta risku ba pasiente sira durante viajen, liuliu ba ema ne’ebé presiza hetan tratamentu emerjénsia iha Suai.
“Ita akompaña iha debate orsamentu iha tinan kotuk, ita nia Ministru Obras Públikas tinan ida-ne’e hateten katak atu mai dahur iha Fatumea, maibé to’o ohin loron ami hein seidauk akontese,” hateten Oscar Pereira Amaral ba jornalista sira iha Fatumea, Tersa (06/10/2026).
Nia hateten, maski to’o ona fulan Outubro no lansamentu fatuk dahuluk ba estrada diresaun Salele–Fatumea seidauk realiza, autoridade lokal nafatin iha esperansa katak Governu sei kumpri promesa iha tinan 2026.
Nia mós informa katak iha inísiu fulan Outubro, iha ona kompanhia ida ne’ebé ba Fatumea halo survey ba área ne’ebé sei uza hanesan fatin armajen ekipamentu, inklui ekipamentu pezadu.
“Maski to’o iha fulan ida-ne’e seidauk halo lansamentu, ami nafatin tau esperansa boot ba ita nia Governu, tanba iha tinan ida-ne’e bele halo lansamentu,” dehan nia.
Oscar subliña katak prezensa kompanhia ne’ebé halo survey refere fó esperansa ba autoridade lokal no komunidade katak projetu reabilitasaun estrada ne’e sei hala’o.
Komunidade Husu Atensaun
Iha fatin seluk, sidadaun Abrão Ribeiro da Silva, ne’ebé uza estrada refere, hateten katak kondisaun estrada husi Fatumea ba Salele atualmente la fasilita movimentasaun transporte públiku no privadu, liuliu motór no kareta.
Nia hateten, durante viajen husi Fatumea ba Suai atu kontinua ba Munisípiu Liquiça, nia rasik sente difikuldade tanba estrada nakonu ho kuak no suvida, ne’ebé halo motorista tenke lori transporte ho kuidadu boot.
“Iha hau nia viajen ne’e husi Fatumea atu ba fali Liquiça, hau sente triste ho kondisaun estrada ne’e. Ita la haree liu ba suvida deit, maibé estrada tetuk aat no kuak barak. Bainhira tula ema sa’e suvida, ema ne’ebé tuur iha kotuk tenke tun; se lae, bele monu, tanba estrada aat no kuak barak,” hateten Abrão.
Tuir nia, Governu presiza tau atensaun ba estrada Salele–Fatumea tanba kondisaun ne’e naruk ona difikulta movimentasaun komunidade sira, inklui moradór husi Suku Belulik Leten, Belulik Kraik, Fatumea no Nanu.
“Estrada ne’e presiza hadia, tanba estrada mak bele fasilita komunidade sira. Dalan di’ak mak bele fó moris ba komunidade. Se ita la hadia, dala oinsá sira bele buka moris,” dehan Abrão.
(tom)
