DÍLI, STLTIMORLESTE.com — Federasaun Boxing Amadora Timor-Leste (FBATL) planeia organiza kompetisaun boxing senior iha fulan Novembru 2026, nu’udar parte programa dezenvolvimentu atleta Timor-Leste.
Staf Administrasaun FBATL, Rocky M. Nahak hateten, federasaun planeia eventu boxing haat kada tinan, kompostu husi kompetisaun senior rua no junior rua.
Hatete nia ba jornalista STL iha Edifísiu FBATL Sporting Dili, Tersa-feira, (22/09/2026), katak orsamentu governu aprova ona ba programa eventu sira.
Maibé, tanba problema no intervensaun husi klub balun, eventu balun la konsege hala’o tuir programa inisiál. FBATL hetan aprovasaun ba eventu rua de’it.
Eventu rua ne’e mak kompetisaun junior ne’ebé hala’o ona iha Juñu no kompetisaun senior ne’ebé planeia hala’o iha Novembru 2026.
“Eventu senior ne’e la’ós de’it buka vensedor, maibé atu sukat kualidade no kapasidade atleta boxing Timor-Leste,” dehan nia.
Tuir Rocky, planu inisiál inklui konvite boxista husi Indonézia, Austrália, Malázia no Singapura atu partisipa iha kompetisaun.
Konvite ba boxista estranjeiru sei fó oportunidade ba atleta Timor-Leste atu hasoru adversáriu husi rai liur no aumenta esperiénsia kompetisaun internasionál.
Nia esplika katak, atleta Timor-Leste dala barak hatudu desempenhu diak iha kompetisaun rai-laran, maibé diferensa téknika mosu bainhira kompete iha rai liur.
Tuir nia, diferensa téknika no preparasaun ne’e presiza atensaun liu husi treinamentu no kompetisaun kontinua, atu atleta bele hadi’a kapasidade.
Rocky mos hateten preparasaun no métodu treinamentu sai dezafiu ba atleta boxing Timor-Leste, liuliu tanba limitasaun ekipamentu no fasilidade treinamentu.
Nia kompara katak boxista iha rai liur komesa uza ekipamentu no makina espesífiku, enkuantu atleta Timor-Leste balun sei depende barak ba treinamentu manual.
“Diferensa iha fasilidade no métodu treinamentu bele afeta preparasaun atleta bainhira hasoru boxista husi nasaun seluk,” nia subliña.
Tanba ne’e, FBATL konsidera eventu senior Novembru nu’udar oportunidade atu avalia progresu atleta no identifika área sira ne’ebé presiza hadi’a.
Federasaun espera programa treinamentu no kompetisaun kontinua bele ajuda Timor-Leste produz boxista ho kualidade atu kompete iha nivel rejionál no internasionál.
(leo)
