DÍLI, STLTIMORLESTE.com — Federasaun Boxing Amadora Timor-Leste (FBATL) rejistu ona klubu boxing hamutuk 33 iha Timor-Leste.
Informasaun ne’e hato’o Staf Administrasaun FBATL, Rocky M. Nahak, ba jornalista STL iha edifísiu FBATL, Colmera, Dili, Tersa-feira (22/09/2026).
Rocky M. Nahak hateten, husi klubu 33 ne’ebé rejistu, maioria hala’o atividade iha Munisípiu Dili, no balun mai husi munisípiu sira seluk.
Iha Dili, rejistu ona klubu boxing 30. Enkuantu Lospalos iha klubu rua, Viqueque klubu ida no Bobonaro klubu ida.
“Klubu ne’ebé rejistu iha FBATL hamutuk 33, inklui 30 iha Dili, rua iha Lospalos, ida iha Viqueque no ida iha Bobonaro,” hateten Rocky.
Nia esplika katak, FBATL determina kritériu administrativu ba klubu sira ne’ebé hakarak rejistu, inklui statutu, estrutura organizasaun, akta no deklarasaun lokalizasaun.
Maibé, Rocky hateten, seidauk klubu hotu ne’ebé rejistu kumpre kritériu administrativu no organizativu hotu, inklui fatin treinu no estrutura organizasaun.
“Kritériu rejistu inklui statutu, estrutura klubu, akta no deklarasaun lokalizasaun. Balun seidauk kompletu, maibé ami fó tempu atu hadia,” nia hateten.
FBATL foin daudaun hasai karta ofisiál ba klubu boxing sira atu kompleta dokumentasaun no hadia estrutura organizasaun kada klubu.
Medida ne’e atu asegura klubu sira ne’ebé rejistu kumpre kritériu administrativu no organizativu ne’ebé determina husi federasaun.
Rocky hateten, husi klubu boxing 33 ne’ebé rejistu, klubu 5 mak konsidera kompletu ona sira nia kritériu rejistu.
Klubu lima ne’e mak Masin Fatuk Boxing Club, Inner Power Boxing, Lospala Boxing, Maubere Pool Boxing no Revolta Combat Boxing.
FBATL sei kontinua fó orientasaun no tempu ba klubu sira seluk atu kompleta dokumentasaun no hadia estrutura organizasaun.
Esforsu ne’e atu hametin organizasaun boxing iha Timor-Leste no prepara klubu sira atu hala’o atividade ho estrutura administrativu klaru.
(leo)
