DÍLI, STLTIMORLESTE.com — Federasaun Taekwondo Timor-Leste ensera formasaun treinador kona-ba poomsae basic, Segunda-feira (28/09/2026), iha Salaun Nahe Biti Boot Ministeriu Juventude, Desportu, Arte no Kultura (MJDAK), Dili.
Prezidente Federasaun Taekwondo Timor-Leste, Gil Alvares Fernandes hateten, formasaun ne’e objetivu atu hasa’e kapasidade treinador sira kona-ba poomsae basic.
Nia hateten, depois formasaun, treinador sira bele fila ba doze ida-idak atu fahe koñesimentu no kapasidade ne’ebé sira hetan ba atleta.
Gil hatutan katak, konvite formasaun fahe ba munisípiu hotu, maibé munisípiu neen de’it mak partisipa, ho kada munisípiu reprezenta ema ida.
Formasaun ne’e partisipa liu-liu husi reprezentante munisípiu Dili no hala’o durante loron neen, ho matéria teoria no prátika kona-ba poomsae.
Nunee mos formador no treinador ekipa nasional, Jacob Befi hatutan, formasaun ne’e aborda poomsae, liu-liu aspetu power, speed no accuracy ne’ebé importante ba kompetisaun internasionál.
“Dader ami iha teoria no lorokraik ami halo prátika, atu formadu sira aprende oinsá bele halo no aplika teoria ne’ebé sira aprende,” Jacob hateten.
Nia esplika, formasaun la’ós de’it kona-ba téknika poomsae, maibé mos prepara treinador atu forma atleta no komprende regra kompetisaun internasionál.
Jacob hateten, partisipante sira mos hetan esplikasaun kona-ba regra no papel árbitru, atu bele foti desizaun diak bainhira hala’o servisu árbitru iha eventu.
Kona-ba dezafiu, Jacob hateten difikuldade ida mak nível koñesimentu treinador sira la hanesan, tanba balun seidauk iha esperiénsia barak kona-ba poomsae.
Nune’e, formador sira presiza esplika matéria ho klaru, atu treinador sira bele komprende no transmite koñesimentu ba sira nia doze no atleta.
Iha parte seluk, Zizelda Guterres da Conceição, partisipante formasaun, hateten, matéria ne’ebé sira simu foka ba téknika bázika taekwondo, liu-liu poomsae.
Nia hateten, formasaun hala’o durante loron neen no remata ona Segunda-feira, ho objetivu atu aumenta koñesimentu kona-ba téknika taekwondo.
“Taekwondo sempre iha mudansa, liu-liu iha téknika. Tanba ne’e ami mai tuir formasaun atu aumenta ami nia koñesimentu,” Zizelda hateten.
(leo)
