DILI, STLTIMORLESTE.com – Festival Rabilau neebe organiza husi Prezidente Republika Jose Ramos Horta ho IX Governu, neebe organiza iha Foho Rabilau nee parte promove Turizmu Relijiozu husi rai laran no rai liur.
Festival Rabilau realiza hahu iha loron 16 too 18 Outubru, no iha Kuarta loraik, Prezidente Republika Jose Ramos Horta halo ona abertura simu ho serimonia kultural boot ida bainhira nia too hodi loke ofisialmente Festival Rabilau 2024.
“Festival neebe halao husi loron 16-18 Outubru tinan nee, selebra patrimoniu kultural riku TL nian no ho objetivu atu hasae turizmu iha rejiaun nee,” hatete PR Horta liu husi Komunikadu neebe STL asesu husi media Prezidensia, Kinta nee (17/10/2024).
Prezidente Republika hatete, Festival Rabilau atu promove atividade sira kultura TL hanesan lia mate, lia moris no seluk tan, oinsa mak hodi promove kultura TL nia husi rai laran no ba rai liur, nunee bele atrai mos turista sira bele mai vizita TL nia paisajen neebe mak furak nee.
Bainhira too Rabilau, Prezidente Ramos Horta simu ho ritual tradisional, haree bua malus, neebe halao husi lia nain, líder kultural komunidade nian. Serimonia benvindu nee hetan partisipasaun husi responsavel superior sira hanesan Primeiru Ministru interinu Mariano Assanami Sabino hamutuk ho reprezentante governu sira seluk.
Tuir mai Prezidente Ramos Horta halo diskursu abertura ida, hodi deklara ofisialmente inísiu festival nian, akompanha ho tambor tradisional sira no espetakulu roket selebrasaun ida.
Kalan nee konklui ho parada kultural neebe vibrante ho grupu sira husi munisípiu 13 hotu iha TL, inklui Rejiaun Administrativa Espesial Oecusse Ambeno (RAEOA). Prosesaun kor oin-oin nee loke palku ba loron tolu espozisaun kultural, espetakulu no envolvimentu komunidade nian, neebe destaka esforsu kolaborativu husi ministeriu oioin governu nian, autoridade lokal sira, parseiru dezenvolvimentu no organizasaun komunitaria sira hodi hatudu tesidu kultural oin-oin TL nian.
(eme)
