DILI, STLTIMORLESTE.com – Realidade neebe mak iha, menus Empregu iha rai laran no joven barak mak sai ba servisu iha rai liur.
“Ita laiha imvestimenu boot ruma atu bele fo servisu ba ita nian joven neebe universidade kada tinan produs, balun too agora seidauk hetan servisu no barak ba servisu iha rai liur bodi bele hetan osan sustenta família, tanba ita iha nee la halo buat ruma, se karik ema iha osan mak bele halo bisnis ruma,” dehan Tomas Magno da Costa hanesan graduadu husi UNPAZ, Fakuldade Ekonomia, Departamentu Kontabilidade ba STL liu husi telefone, Domingu nee (01/06/2025).
Tomas dehan, diak liu mak maluk hirak neebe mak remata estudu tuir fali formasaun lingua ninia, ho nunee aumenta konhesimentu neebe mak diak liu ba lingua, sai ba servisu iha rai liur diak, se lae remata iha universidade la halo buat ida, tanba vaga neebe mak loke nee la barak ida, oinsa mak atu fo servisu ba joven neebe mak seidauk hetan servisu.
Iha parte seluk, Prezidente Instituto Politeknik Betano (IPB), Acacio Cardoso Amaral hatete, bainhira iha industria, hanoin ba oin nee dala ruma trabalhador mak falta, maibe situasaun ida agora daudaun nee industria seidauk mosu barak iha rai laran, presiza iha investimentu neebe barak liu tan, industria barak atu nunee bele absolve trabalhador barak liu tan iha rai laran.
“Ita boot sira hatene katak, ita iha Timor nee, ita nian populasaun nee um pontu tres, maibe ita iha universidade hamutuk sanolu resin sia, universidade privada iha 17, publiku rua UNTL no IPB, agora ita nian industria mos seidauk dezenvolve ho diak, hanesan ita boot sira mos hatene, tanba nee atu absolve hotu graduadus kada tinan nee araska oituan, tanba maioria agora setor publiku, governu halo rekrutamentu liu husi ministeriu oin-oin, maibe seidauk absolve hotu, setor privadu seidauk dezenvolve ho diak,” nia dehan.
(jac)
