DILI, STLTIMORLESTE.com – Feto tenke asesu ba poder ekonomiku hodi dezenvolve nesesidade dezenvolvimentu neebe signifikante iha Timor Leste.
Kestaun nee hatoo husi Embaixador Uniaun Europeia iha Timor Leste, Marc Fiedrich, liu husi nia diskursu bainhira partisipa abertura loja hakbiit Feto iha salaun Rede Feto Timor Leste, Tersa (05/11/2024).
Embaixador hatete, simplesmente labele ignora forsa trabalhu, intelijensia no kriatividade husi feto sira ho esforsu tomak neebe presiza hodi lori nasaun ida nee ba oin.
“Uza feto sira nia direitu ba partisipasaun ekonomika, bele ajuda rezolve relasaun sira neebe laiha balansu neebe eziste, porezemplu bainhira mane sira uza sira nia propriedade ba rai, ba kapital, ka ba makina sira nuudar dalan ida atu reforsa sira nia dominasaun ba sira nia feen, ka ba feto sira seluk neebe haleu sira. Ida nee la justu no ida nee perpetua injustisa sira neebe eziste. Atu hateten buat neebe klaru feto sira mos tenke iha asesu ba poder ekonomiku,” dehan Embaixador.
Embaixador hatete, ho liafuan badak, aumenta feto sira nia partisipasaun iha ekonomia lori lukru ba família, iha servisu fatin no iha sosiedade tomak.
Nunee mos Reprezentante Adra Timor Leste, Sanjay mathey hatete, involvimentu feto iha atividade ekonomika liu husi oferese atividade negosiu.
“Loja ida nee mos responde ba preokupasaun sira neebe eziste kona-ba disponiblidade espasu adekuadu ba grupu feto sira atu halo konsolidasaun ba sira nia projetu sira,” katak nia.
Liu husi projetu hakbiit feto ADRA TL hamutuk ho parseru rede feto fo formasaun oin-oin ba grupu feto sira iha munisipiu 4 liu husi implementasaun programa kampu ba agrikultura sira rai no imprestimu osan formasaun bazika kona-ba literaria no negosiu no fornesimentu ekipamentus prosesamentu nia.
(eme)
