DILI, STLTIMORLESTE.com – Embaixadora Timor Leste ba Comunidade dos Países de Língua Portuguesa (CPLP), Natalia Carrascalão simu orientasaun husi Prezidente Republika Jose Ramos Horta, antes halao misaun iha CPLP.
Bainhira remata hasoru malu, Embaixadora Timor Leste ba CPLP, Natalia Carrascalão ba jornalista sira iha palasiu Prezidensial Nicolau Lobato, Bairo Pite, Kuarta (01/04/2026) hatete, ohin mai hasoru malu ho Prezidente Republika hodi simu orientasaun ruma saida mak sei halo durante misaun iha CPLP.
“Hau foin hasoru Prezidente Republika simu orientasaun ruma hau atu hetan hau nia knaar iha CPLP semana oin hau atu husik Timor, ohin mai hasoru Prezidente Republika koalia situasaun saida mak iha Portugal, prinsipalmente simu orientasaun husi senhor Prezidente Republika,” dehan Embaixadora.
Iha hasoru malu nee orientasaun saida mak Prezidente Republika rekomenda ba Embaixadora? Hatan ba kestaun nee Embaixadora hatete, rekomenda deit assuntu neebe baibain diskute liga ho knaar nuudar embaixadora nia.
“Asuntu baibain ita diskute CPLP nee saida mak bele halo iha neeba no Prezidente Diplomata ida iha esperensia nuudar Prezidente Republika hau tenke rona saida mak senhor Prezidente orienta hau halo nuudar embaixadora CPLP,” katak nia.
Foin lalais Prezidente Republika Jose Ramos Horta fo pose ba Natalia Carascalao hodi assume kargu nuudar xefe foun misaun permanente timor-leste nian ba CPLP.
Nomeasaun Embaixadora Natalia Carrascalão nee formaliza tuir Dekretu Prezidente Republika No.22/2026. Embaixadora Natalia Carrascalão substitui Xefe anterior ba Misaun Permanente Republika Demokratika Timor-Leste ba CPLP, Embaixadora Laura Soares Abrantes.
Embaixadora Natalia Carrascalão lori esperiensia distinta liu dekada rua iha area diplomatika no polítika ba nia knaar foun. Nia muda husi nia pozisaun nuudar Asesora Pesoal ba Prezidente Republika, papel ida neebe nia kaer ho distinsaun dezde Setembru 2024. Ninia kareira diplomatika neebe extensivu inklui serbisu nuudar Embaixadora Timor-Leste nian iha Singapura (2020-2024), Laos (2016-2020), Portugal, España, no Cabo Verde (2020-2020), durante neebe nia mos halao knaar nuudar Embaixadora ba CPLP.
Molok nia misaun diplomatika sira, nia nuudar Xefe Gabinete ba Prezidensia Republika (2007-2009), no asumi kargu polítiku oioin ho partidu PSD, no mos knaar sira iha kargu publiku. Embaixadora Natalia Carrascalão nuudar Deputada Parlamentu Portugal (1999-2005) no nia eskola direitu iha Universidade Macau. Embaixadora Natalia Carrascalão nia kontribuisaun sira hetan ona onra ho Insígnia Orden Timor-Leste nian no títulu Grande Ofisial Orden Meritu nian (Portugal) no seluk tan.
(eme)
