LAUTÉM, STLTIMORLESTE.com – Komandu Polísia Munisípiu Lautém sei hametin seguransa iha semitériu sira durante loron finadu, husi 1 to’o 3 Novembru, ho prioridade ba semitériu jerál iha área Kuluhun Suku Fuiloro, Postu Administrativu Lospalos.
Komandante Komandu Polísia Munisípiu Lautém, Superintendente Xefe Polísia António Rego Fernandes, hateten katak planu operasaun seguransa ba loron finadu sei kontinua husi planu ne’ebé implementa ona durante Festival Fronteira 2026 iha Suku Com, Postu Administrativu Lautém.
Nia esplika katak semitériu jerál iha Kuluhun sai prioridade tanba simu família no komunidade husi área oioin, inklui ema husi Luro no grupu étniku oioin, ne’ebé sei vizita rate no sunu lilin ba sira-nia matebian.
“Semitériu jerál ne’e la’ós grupu étniku ida de’it mak iha ne’ebá, maibé ema husi grupu seluk mós barak hakoi sira-nia família iha fatin ne’e. Tanba ne’e, ita foka liu ba semitériu ida-ne’e,” António Rego Fernandes hateten ba jornalista sira iha Com, Sábadu (24/10/2026).
Nia hatutan katak, aleinde semitériu jerál iha Kuluhun, Polísia sei halo vijilánsia mós iha semitériu seluk iha postu administrativu no suku sira, atu prevene problema no garante seguransa ba komunidade durante períodu loron finadu.
Komandu Polísia Munisípiu Lautém husu ba komunidade atu kolabora ho autoridade seguransa no respeita orden públiku, hodi garante katak vizita rate lao ho dame no hakmatek.
(tom)
