DILI, STLTIMORLESTE.com – Estudantes finalista husi Ensinu Baziku Central (EBC) Manleuana hamutuk 259 sei partisipa iha ezame nasional ne’ebé sei hala’o iha loron 19 fulan Outubru tinan 2026.
Liafuan ne’e hato’o husi Gabinete Apoiu Tékniku (GAT) EBC Manleuana, Narciso Pinto Soares Vieira da Costa, ba STL iha nia fatin servisu, Tersa (15/09/2026).
Narciso hatete katak, eskola kria ona komisaun ida atu prepara estudante sira ba ezame nasional, maibé atividade ensinu no aprendizajen loroloron nian nafatin lao hanesan bai-bain.
“Oras nee dadaun ami husi eskola kria ona komisaun ida hodi prepara ba ezame nasional iha fulan Outubru tinan nee. Atividade ensinu no aprendizajen kada loron nian nafatin lao hanesan bai-bain. Total estudantes finalista ne’ebé sei partisipa iha ezame nasional tinan nee hamutuk 259,” nia esplika.
Nia akresenta katak, estudante sira nafatin partisipa iha aula kada loron no simu matéria husi professor sira, tanba preparasaun ba ezame nasional sei kontinua tuir kalendáriu ne’ebé determina ona.
“Ita kria ona komisaun ba preparasaun ezame nasional, tanba tuir kalendáriu ezame nasional sei hala’o iha loron 19 fulan Outubru tinan nee. Estudante sira sei partisipa iha ezame refere, no prezensa estudante sira iha aula kada loron lao diak hanesan bai-bain,” nia dehan.
Enkuantu, estudante Antonio de Jesus hatete katak estudante sira presiza estuda no tuir aula loroloron atu prepara an ba ezame nasional, hodi nune’e bele hamenus difikuldade durante ezame.
“Fulan oin ami hahu tuir ezame nasional, nune’e presiza estuda no tuir aula loroloron, atu labele hasoru difikuldade iha prosesu ezame nasional ne’ebé sei akontese iha fulan Outubru. Ami sei nafatin mai eskola loroloron hodi simu matéria husi profesor sira,” nia dehan.
Estudante seluk, Manuela da Costa Moniz, mos hatete katak preparasaun mak importante ba estudante sira, liuliu liu husi estuda no esforsu an.
“Nudar estudante, ami presiza preparasaun liu husi estuda no halo preparasaun máximu. Se preparasaun diak, buat hotu bele lao diak iha ezame. Maibé, bainhira laiha preparasaun, bele hamosu difikuldade iha ezame. Tanba nee, ami tenke esforsu an no tuir aula ho máximu kada loron,” nia akresenta.
(jac)
