BAUKAU, STLTIMORLESTE.com – Delegasaun Territorial Florestal, Kafe Plantas no Industria Baukau, durante trimestral dahuluk tinan nee prende ai komersial karada 10 husi Suku Gariuai, Postu Administrativu Baukau Vila.
Xefe Departamentu Delegasaun Territorial Florestal, Kafe Plantas no Industria Baukau, António José Lopes aprezenta, durante trismestral dahuluk operasaun guarda florestal Baukau nian, la deteta kazu naok aikameli no seluk tan, maibe konsege halo apreensaun ba ai komersial karada 10, tanba laiha lisensa.
“Karada 10 nee aibubur sira laiha konhesimentu husi floresta, entaun foti desizaun prende,” Xefe Departamentu Delegasaun Territorial Florestal, Kafe Plantas no Industria Baukau, António José Lopes hateten ba STL iha nia knaar fatin, Vila Nova Baukau, Kuarta (29/04/2026).
Nia sublinha, aibubur karada 10 refere komete husi empreza sira neebe halo produsaun tahu no tempe iha Baukau Vila.
Nia fundamenta, hafoin ekipa prende ai refere, asegura kedas sidadaun neebe komete inklui kareta truk neebe tula no prende motosera neebe tesi submete kedas ba parte diresaun nasional atu fo sansaun multa.
“Nia multa nee todan, ita sura normal nee selu US$ 6.00 kada estapa meter, maibe nee liga ho lei bele selu dobel husi selu normal nee,” António José Lopes akresenta.
Nia dekalara, durante nee Delegasaun Territorial Florestal, Kafe Plantas no Industria halo ona sosializasaun no sensibilizasaun dala barak ba regras tesi ai no tula ai, maibe parte komunidade barak seidauk iha konhesimentu, tanba kontinua komete asaun tula ai no tesi ai laiha lisensa.
Nunee nafatin husu ba komunidade sira bainhira iha nesesidade atu tesi ai no tula ai tenke informa ba Delegasaun Territorial Florestal, Kafe Plantas no Industria Baukau hodi hetan autorizasaun, nunee labele mosu dezentendimentu apreensaun iha dalan husi Guarda Florestal sira neebe daudaun halao patrolla rutina iha terrenu.
Entretantu Guarda Florestal neebe destaka iha Delegasaun Territorial Florestal, Kafe Plantas no Industria Baukau, kada Postu iha Guarda Florestal hamutuk nain 10 resin neebe daudaun destaka iha kada Postu Administrativu sira, la inklui Postu Kelikai Antigu no Matebian.
(tom)
