DILI, STLTIMORLESTE.com – Foinsae mak futuru nasaun, maibe ohin loron joven barak remata nia estudu laiha kampu servisu, ida nee mos dezafiu ida, husu keta lakon esperansa ba futuru.
Kestaun nee hatoo husi Caetano Jose Freitas, Funsionariu Universidade Nasional Timor Lorosae (UNTL), iha Gabinete do Pro-Reitor para os Assuntos de Desenvolvimento de Infraestrutura (PRADI) ba STL, Tersa (28/07/2026) husu foinsae feto no mane kontinua estuda maske ohin loron sei hasoru dezafiu iha kampu serbisu.
“Ba foinsae sira, hau hakarak fo mensajen simples kontinua aprende no kontinua estuda, maski dalan nee la sempre fasil. Ita hatene katak agora iha Timor-Leste, foinsae barak remata ona estudu maibe seidauk hetan servisu, tanba oportunidade serbisu mos seidauk barak. Tanba nee, dala ruma ema bele hanoin katak “estuda aas ikus mai atu buka osan deit. Maibe tuir hau nia hanoin simples, estudu laos deit atu buka osan. Estudu ajuda ita atu loke hanoin, aumenta konfiansa, hatene hili dalan neebe diak, no bele ajuda família, komunidade, no nasaun. Osan importante, maibe konesimentu no kapasidade mak bele ajuda ita atu la fasil monu, no bele buka oportunidade foun ho dalan neebe diak liu tan. Tanba nee, ba foinsae feto sira, labele lakon esperansa. Kontinua aprende, kontinua kapasita aan, no labele sente moe atu sonha. Dalan bele kleur, maibe edukasaun sei nafatin sai baze importante ba ita-nia futuru,” katak nia.
Nia mos husu feto sira kontinua kapasita aan bele partisipa iha prosesu dezenvolvimentu Nasional tanba nasaun ba oin presiza feto nia kontribuisaun mos.
“Ba feto sira hotu, hau hakarak fo mensajen simples katak kapasita aan mak buat importante ida. Dezenvolvimentu nasional la bele lao ho grupu ida deit, maibe presiza kontribuisaun husi ema hotu, inklui feto sira iha família, komunidade, instituisaun, no area servisu oioin.
Tanba nee, feto sira labele stop iha aprende no hadia kapasidade. Maski oportunidade dala ruma seidauk barak, maibe ho konesimentu, disiplinia, no konfiansa, feto sira bele partisipa iha prosesu dezenvolvimentu Timor-Leste, liu liu iha edukasaun, saude, administrasaun, economia, teknologia, engenharia, no area seluk. Hau fiar katak bainhira feto sira hetan oportunidade no kontinua kapasita aan, sira bele fo kontribuisaun boot ba família, komunidade, no nasaun. Dezenvolvimentu Timor Leste presiza ita hotu nia liman, hanoin, no responsabilidade hamutuk,” hakotu.
Nunee mos Amito Qonusere Araujo hanesan mos Tekniku Espesializada Komunikasaun Sosial iha Sekretaria Estadu Komunikasaun Sosial (SECOMS) husu joven sira kapasita aan hahu husi agora hodi bele kontribui ba iha konstrusaun estadu.
“Hau nia mensajen ba maluk foin-sae sira katak, futuru nasaun iha ita nia liman, importante, keta haluha agradese ba Maromak, no perdua ita nia maluk sira neebe halo hasoru ita, kuandu iha problema psikolojia. Keta haluhan mos atu aprende lee no kontinua aprende nafatin iha edukasaun formal no naun formal nunee bele hetan esperiensia no kapasidade atu bele kontribui ba rai nee tuir ita nia matenek neebe iha,” dehan nia.
Nia hatutan bele halao estudu iha maibe nafatin kapasita aan liu husi formasaun sira nunee hasae tan koinesementu nunee bele partisipa iha prosesu kontrusaun estadu tanba nasaun nee iha joven sira nia liman.
“Nuudar foinsae, keta haluhan atu partisipa iha formasaun oin oin, tanba liu husi formasaun mak hatudu ita nia dalan diak ba futuru, atu partisipa iha prosesu dezenvolvimentu nasional. Se ita halimar ba sosial mídia deit, la aproveita ho didiak, ita rasik mak sei baku rentos mais buat hotu liu ona.” Dehan Amito.
Prezidente Republika Jose Ramos Horta rekonhese daudaun nee seidauk iha kampu servisu, maibe iha tinan ida nee ba oin investor sira sei loke kampu servisu barak iha rai laran presiza trabalhador barak tanba nee husu atu prepara aan.
Prezidennte Republika hatete, Timor daudaun nee seidauk iha kampu servisu, tanba nee halo joven lubuk barak ba serbisu iha Australia, Irlandia, Korea, maibe dadaun ba oin investor sira hahu halo investimentu iha Timor Leste, liu-liu iha Manatuto, Laleia nee sei presiza joven barak.
(eme)
