DILI, STLTIMORLESTE.com – Forum Komunikasaun Feto Timor Leste (Fokupers) husu Governu no Parlamentu Nasional tau uluk prioridade ba povu moris diak ona, mak bele sosa karreta ba Deputadu no Depuatada sira.
Kestaun nee hatoo husi Diretora Ezekutivu Fokupers, Domingas Afonso Amaral ba STL iha nia knaar fatin, Farol, Sesta (25/10/2024).
Nia hatete, tuir Fokupers nia observasaun haree katak, oras nee daudaun povu barak sei moris kiak tebes, estrada iha area remotas barak mak kondisaun la diak, sentru saude sira menus aimoruk, no eskola barak kondisaun la diak, diak liu tau prioridade uluk depois povu moris dignu ona bele aloka orsamentu hodi sosa kareta ba Deputadu no Deputada sira.
“Povu Timor Leste moris iha kiak no mukit nia laran, ema barak sei moris terus, ema balun mos la hetan hahan bikan ida atu han iha moris loron loron susar tebes, no kondisau estrada sei aat iha area rural sira, feto sobrevivente no feto sira atu lori deit sira nia hahan ka produtu ruma atu mai faan iha vila mos sei hasoru dezafiu, tanba kondisaun estrada neebe la permite, entaun sira laiha opasaun barak ba sira nia moris liu-liu oinsa atu hetan rendimentu para bele sustenta sira nia familia ho hahan loron-loron iha meza leten, no labarik barak mos seidauk asesu ba eskola tanba barak sei moris iha kiak no mukit, tanba eskola neebe dook entaun ema prefere hela uma duke ba eskola distansia neebe dook, no seluk tan,” katak Diretora nee.
Diretora nee dehan, mereda eskolar iha eskolar neebe oferese ba estudante sira mos kondisaun ladun diak ou ladun natoon atu hatan ba labarik liu-liu ba kondisaun ba ema sira neebe mak prepara merenda eskolar.
Tanba tuir Fokupers nia monitorizaun no asesmentu neebe halo iha Munisipiu 4 hanesan Oekusi, Ermera, Bobonaro nomos Vikeke iha kondisaun eskola neebe la dignu ema atu bele tuir prosesu aprendizajen, no menus kadeira no meza no fatin tein merenda eskolar mos laiha kondisaun halo labarik sira tuur deit iha rai mak han, no kondisaun hodi prepara mereda eskolar mos la permite.
“Ita haree katak ema barak sei moris laiha kondisaun ida neebe mak sei hasoru kiak no susar, entau ami hanoin katak se karik bele liu-liu parlamentu sira tau prioridade atu haree lai ba nia povu sira, fo kondisaun neebe dignu duni povu moris ona ho dignu no hakmatek asesu ba eskola, saude, asesu ba infraestrutura sira los no diak ona mak membru parlamentu sira iha hanoin para sosa karreta ba aan,” katak Diretora nee.
Nunee mos Prezidente Rede Feto Timor Leste, Zelia Fernandes hatutan, tuir sira nia haree povu sira iha area remotas barak sei moris iha terus nia laran tanba estrada ladiak, susar ba komunidade atu lori sira nia produtu bai ha merkadu, no eskola barak mos kondisaun ladiak, falta meza kadeira, iha klinika barak laiha aimorok no menus mediku ida nee sai preokupasaun boot.
“Tanbe nee mak husu Governu iha orsamentu jeral estadu ba tinan 2025 bele aloka barak iha area edukasaun, saude no agrikultura, nunee bele hadia irisaun nunee bele hasae produsaun no sosa meza kadeira, sosa aimorok,” katak nia.
Foin lalais Konselhu Ministru liu husi ninia reuniaun estra- ordinaria iha loron 30 Setembru, aprova ona proposta Orsamentu Jeral Estadu ba tinan 2025 ho montante bilhaun US$ 2.6.
Proposta Lei OJE nian ba tinan 2025 kontinua estratejia implementasaun prioridade sira neebe hatuur iha Programa Governu dasia nian, ho lema Investimentu iha infraestrutura estratejika sira, hametin ekonomia no hadia sidadaun sira-nia moris diak.
(eme)
