BAUCAU, STLTIMORLESTE.com – Folin fós iha merkadu no loja sira iha Munisípiu Baucau hatudu diferensa tuir marka, peso no fatin venda, ho Folsom 20 kg sa’e to’o US$ 15.75.
Observasaun STL nian iha loron 25 Setembru 2026, iha loja balu iha Vila Antiga, faan fós marka Makikit Lorosa’e, Golden Star, Kuda Ulun no Lafaek, kada saka 25 kg, fa’an ho folin US$ 12.25.
Enkuantu marka Nona Manis no Tali Merah, kada saka 25 kg, fa’an ho folin US$ 12.00. Marka Ama Gosta fa’an ho folin US$ 11.00, Tuna US$ 11.75, no Folsom 20 kg ho folin US$ 14.50.
Iha área Tirilolo, fós marka Folsom 20 kg fa’an ho folin US$ 15.00. Marka Vasco Gama, Happy no Hadomi, kada saka 20 kg, fa’an ho folin US$ 10.00.
Ba marka Tali Merah no Amor da Família, kada saka 25 kg, kada ida fa’an ho folin US$ 12.00.
Enkuantu iha área Vila Nova, fós marka Tali Merah 25 kg fa’an ho folin US$ 12.00 no 20 kg US$10.00. Marka Golden 25 kg fa’an US$ 12.50, no 20 kg US$ 10.50.
Makikit Lorosa’e 20 kg iha Merkadu Munisípal Baucau fa’an ho folin US$ 10.25, enkuantu Folsom 20 kg to’o US$ 15.75.
Konsumidór Natalia da Silva preokupa ho kualidade fós importadu ne’ebé fa’an iha merkadu, tanba tuir nia esperiénsia, fós balu bainhira tein sae no balu la sae.
Tuir Natalia, fós marka Folsom iha kualidade di’ak, maibé nia folin konsidera karun liu kompara ho fós marka sira seluk.
Nia husu autoridade kompetente atu halo kontrolu ba folin fós iha merkadu, tanba distánsia entre Vila Antiga no Vila Nova la dook malu, maibé folin fós marka hanesan bele hatudu diferensa.
“Halo ita admira folin fós Folsom ne’e. Iha Vila Antiga presu US$14 resin, mai fali iha Vila Nova US$15 resin. Presiza buka tuir nia kauza ne’e tanba saida,” Natalia hateten ba STL iha Vila Nova, Baucau, Sesta (25/09/2026).
Natalia komenta katak diferensa folin fós sai atensaun ba konsumidór sira iha Baucau, liuliu bainhira produtu no marka hanesan fa’an iha fatin ne’ebé besik malu, maibé ho folin diferente.
Kona-ba folin fós atual iha Merkadu Munisípal Baucau, STL seidauk hetan komentáriu diretamente husi na’in ka proprietáriu loja sira kona-ba razaun diferensa folin ne’e.
Dadus folin ne’ebé STL publika, rekoilha husi traballadór sira iha kada loja, bazeia ba folin fós ne’ebé disponivel iha momentu observasaun, loron 25 Setembru 2026.
(tom)
