BAUCAU, STLTIMORLESTE.com – Folin sementi marka Tonasa iha loja konstrusaun sira iha Vila Nova no Tirilolo, Munisípiu Baucau, ho folin variável entre US$ 5.25 to’o US$ 6.00 kada saka.
Bazeia ba observasaun folin ne’ebé STL rekoilha iha 25 Setembru 2026, iha área Vila Nova Baucau, loja konstrusaun rua ne’ebé pertense ba ema Xineza aplika folin sementi Tonasa US$ 5.25 kada saka.
Enkuantu loja konstrusaun sira seluk ne’ebé pertense ba Timor-oan, iha área Vila Nova no Tirilolo, aplika folin diferente, komesa husi US$ 5.25, US$ 5.50, no balu to’o US$ 6.00 kada saka.
Ba sementi marka Conch, stok ne’ebé disponivel iha Merkadu Munisípal Baucau aplika folin US$ 5.00 kada saka. Tuir observasaun STL, sementi Conch ne’e fa’an de’it iha loja konstrusaun ida ne’ebé pertense ba Timor-oan, enkuantu iha loja konstrusaun seluk la disponivel.
Aleinde ne’e, observasaun iha merkadu mós hatudu katak iha loja konstrusaun balu stok sementi mamuk, ne’ebé bele afeta disponibilidade ba konsumidór.
Kompradór Cedelizio Moreira preokupa ho aumentu folin sementi iha loja konstrusaun sira iha kapitál Munisípiu Baucau, tanba, tuir nia esperiénsia, folin sementi agora diferente ho folin iha fulan kotuk.
“Fulan kotuk ha’u mai sosa sementi Tonasa ne’e, folin saka ida US$ 4.00 resin de’it. Agora sae tiha ba US$ 5.25 iha loja Xina nian ne’e,” hateten Cedelizio ba STL iha Planaltu Vila Nova Baucau, Sesta (25/09/2026).
Nia deklara katak la hatene klaru kauza husi aumentu folin sementi atual. Maibé, nia husu Governu atu halo intervensaun no monitorizasaun ba folin iha merkadu, tanba aumentu folin sementi bele aumenta kustu konstrusaun, liuliu ba família ho rendimentu kiik ne’ebé halo konstrusaun uma privadu.
To’o notísia públiku, STL seidauk hetan komentáriu husi na’in ba loja konstrusaun sira iha Munisípiu Baucau liuliu iha área Vila Nova no Tirilolo.
(tom)
