DÍLI, STLTIMORLESTE.com — ABC ID Programa Fundamental Jornalizmu servisu hamutuk ho Conselho Imprensa (CI) realiza formasaun durante loron lima ba jornalista media nasional.
Formasaun ne’e loke diretamente husi Diretor Ezekutivu Conselho Imprensa, António Dias, iha Salaun Conselho Imprensa, Dili, Segunda-feira, 5 Setembru 2026.
Partisipante sira mai husi Iklik News, SAP News, Radio Loriko, RCC, Jornal Independente, Jornal Timor Post, STL Corp, Tatoli, Radio Komunidade Turiskai no media seluk.
Formasaun ne’e nia objetivu mak dezenvolve koñesimentu no kapasidade jornalista sira, liuliu kona-ba prinsipiu fundamental jornalizmu no prática profisional.
António Dias iha abertura hateten katak, formasaun ne’e oportunidade importante atu jornalista sira servisu hamutuk no fahe koñesimentu.
Nia subliña katak, dezenvolvimentu kapasidade jornalista presiza kontinua, atu jerasaun Timor-oan bele haforsa setor media nasional.
“Uza didiak oportunidade formasaun durante loron lima ne’e no aproveita tempu atu aprende ho diak,” dehan António Dias.
Nia mos hato’o dezeju ba partisipante sira no oficialmente loke formasaun jornalizmu ne’e.
Atividade ne’e sei hala’o durante loron lima, ho esperansa atu aumenta kapasidade profisional jornalista sira iha hala’o servisu.
Nune’e, jornalista sira bele kontinua hala’o knaar ho responsabilidade, profisionalizmu no tuir prinsipiu fundamental jornalizmu.
(leo)
