DILI, STLTIMORLESTE.com – Oras nee daudaun formasaun ofisial Justisa Defensor Publiku (PD) nian iha Sentru Formasaun Juridiku no Judisiariu (SFJJ) iha hela faze teoria.
“Agora tama hela faze teoria, depois ida nee sei integra ba faze pratika no estajiu, bainhira sira aptu sira sei asumi responsabilidade nuudar ofisial justisa, se sira la aptu signifika sira tenke sai husi ofisial justisa,” dehan Defensor Publiku Jeral, Cansio Xavier ba jornalista sira iha Kaikoli, Kuarta (19/08/2026).
Nia hatutan, sira halao ona teoria durante fulan rua, tanba nee sei iha faze eleminatoriu, iha ona faze estajiu final mak foin deside konaba sira nia formasaun nee liu ka lae.
Iha fatin ketak, Akademiku UNTL Rafael De Jesus dehan, teste sira neebe halo tenke ho rigor, atu produs ema ida ho kapasidade neebe diak.
“Hanoin formasaun sira hanesan nee tenke halao selesaun ba teste ikus ho rigor, atu nunee kandidatu ida neebe asumi knar hanesan autor judisiariu, tenke ho kapasidade neebe diak atu labele hamosu prekupasaun iha publiku,” dehan nia.
Dehan, kuandu sentru formasaun produs kandidatu sira ho kualidade, maka sistema sektor justisa kontinua sei lao ba oin lori justisa ba oin.
Alende nee, Diretor Sentru Formasaun Juridiku no Judisiariu, Fransisco xavier Vasco Soares dehan, Centru Formasaun Juridiku no Judisiariu (CFJJ), oras nee dadaun halao hela formasaun ba iha oitavu kursu Majistradu judisial, tamba nee formasaun sira nee ho rigor se maka hatene ho valor diak maka bele passa ba iha kareira Juiz, Prokurador, Advogadu Privadu, no Ofisial Justisa Defensor Publiku nian.
“Formasaun nee ho rigorozu se maka hatene maka bele passa, se la hatene labele passa tamba knar neebe iha importante tebes, presija ema ida neebe hatene duni maka bele passa, la ejiste familiarizmu tamba formador sira balu mai husi rai liur,” dehan Vasco.
Nia hatutan, oras nee dadaun iha Ofisial Justisa Defensor Publiku nian hamutuk 23, sira halo hela formasaun iha CFJJ, sira nee mos sei liu husi selesaun rigorozu, se maka hatene maka bele liu.
Tuir nia, formasaun neebe lao hela iha CFJJ ba iha oitavu kursu nian, kompostu husi formados ba kareira Juiz nain 12, Prokurador nain 11, no Defensor Publiku nain 10, sira nee durasaun ba iha formasaun durante tinan tolu.
(ter)
