LIQUIÇA, STLTIMORLESTE.com — Forsa Konjunta detein joven mane ida, suspeitu tula arma branka ilegal, iha operasaun kontrolu transporte.
Tuir fonte konfirmadu ne’ebé STL asesu, suspeitu ho inisiál GdSG, tinan 23, detein iha área Pilila no Maubara.
Operasaun ne’e hala’o husi PNTL, F-FDTL, PCIC, SNIE, Alfândega no Seksaun Polísia Tránzitu PNTL Munisípiu Liquiça.
“Ita hala’o operasaun ne’e hamutuk ho instituisaun sira atu kontrola transporte no prevene movimentu sasán kontra bandu,” hatete fonte ba jornalista STL liu husi telefone, Kuarta-feira (23/09/2026.
Fonte dehan, autoridade identifika suspeitu bainhira nia kondús kareta ho matríkula A-17840-TL, husi Bobonaro ba Dili.
Durante revista iha kareta, autoridade apreende arma branka kilat manu marka Sharap Innova Tiger, ne’ebé suspeita tula ilegalmente.
Apreensaun akontese durante atividade checkpoint ba transporte públiku, kareta no motor, hodi prevene movimentu sasán kontra bandu.
“Suspeitu no evidénsia entrega ba Komandu PNTL Munisípiu Liquiça hodi kontinua prosesu investigasaun tuir prosedimentu legal,” nia deklara.
Komandu PNTL Munisípiu Liquiça rejista kazu ne’e ho NUK 0050/26.LIMBR, no suspeitu hela iha detensaun durante períodu legal.
Suspeitu sei aprezenta ba autoridade judisiária no Tribunal hodi hala’o interogatóriu dahuluk no determina medida tuir lei.
Forsa Konjunta sei kontinua hametin kontrolu integradu iha fronteira no estrada prinsipál, hodi prevene movimentu sasán kontra bandu.
Operasaun ne’e mós foka ba prevensaun tula arma ilegal no atividade sira ne’ebé bele ameasa seguransa no ordem públika.
(jen)
