DILI, STLTIMORLESTE.com – Tribunal Judisial Primeira Insansia Dili halao julgamentu ba arguidu ho inisial NDX, tanba foti Gurinda no Bor iha Loja ida iha Dili laran, neebe pertense ba lezadu WW nian.
Tuir Akuzasaun neebe Juiz Prosesu Jose Gonsalves lee sai iha Tribunal loron Tersa (05/11/2024) katak, iha loron 25 fulan Setembru tinan 2022, iha loja YMEI neebe situada iha Bairo Pite, arguidu uza bisikleta ba iha lezadu nia loja, no banhira too arguidu lao tama ba loja laran hodi foti Gurinda ida no Bor ida.
Arguidu nia hahalok refere akapta husi CCTV neebe monta iha loja laran, no Gurinda neebe arguidu foti ho valor US$ 65.00 no Bor refere ho valor US$ 50.00.
Konsekuensia nesesariamente husi arguidu nia konduta nee, hamosu prejuizu ba lezadu ho valor total US$ 150.00.
Arguidu halo nia hahalok nee ho forma livre deliberada, hatene katak hahalok nee lei bandu maibe halo nafatin.
Tanba nee, Ministeriu Publiku akuza arguidu komete krimi Furtu Agravadu neebe previstu iha artigu 252 husi Kodigu Penal.
Hatan ba akuzasaun neebe iha arguidu deklara katak, faktus neebe konsta iha akuzasaun loos hotu.
Katak loos duni momentu neeba arguidu foti Bor ida iha loron primeiru, depois iha loron segundu arguidu ba foti tan Gurinda ida, depois sistema CCTV deteta hetan, tanba nee arguidu sai mai liur ema kaer kedan arguidu.
Arguidu deklara, momentu neebe arguidu halo hela kama, tanba nee mak arguidu hare Bor no Gurinda la iha, arguidu hodi tenta ba foti iha Loja.
Arguidu deklara tan, momentu neeba lezadu sira kaer toman tiha arguidu, arguidu sente nia hahalok nee la diak, no arguidu hasoru lezadu sira halo akordu no arguidu fo tiha ona US$ 100 no hela restu maka arguidu seidauk fo, no arguidu fo tiha osan refere, Gurinda no Bor iha fali arguidu nia liman.
Arguidu rekonhese, nia hahalok nee la diak, tanba foti sasan iha Loja sem husu ba iha loja nain, tanba nee arguidu arepende ona, no promete iha Tribunal sei la halo tna hahalok nee.
Iha sala julgamentu laran, lezadu mos haforsa tan akuzasaun katak, arguidu foti duni sasan, no sistema CCTV maka deteta, maibe sira halo akordu arguidu fo ona osan sorin.
Lezadu la konese arguidu, no la iha relasaun familia no arguidu.
Rona tiha lezadu no arguidu, iha alegasaun Prokurador Pedro Baptisa, mantein ho akuzasaun neebe iha, no husu Tribunal atu aplika pena neebe adekadu ba arguidu.
Enkuantu husi defeza Manuel Amaral, husu Tribunal tetu sirkunstansia hotu, arguidu foin primera vez mai iha Tribunal, atu aplika pena neebe justu no kaman ba arguidu.
Rona tiha alegasaun, Tribunal adia ba loron hodi rona desizaun.
Audensia julgamentu nee, prezide husi Juiz Kolektivu, Jumiati Freitas, Jose Gonsalves, Jose Quintao, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Manuel Amaral.
(ter)
