DIL, STLTIMORLESTE.com – Prezidente Republika (PR), Jose Ramos Horta kondekora eis Primeiru Ministru Reinu Kamboja iha palestra prezidensial 2025.
Prezidente Republika Jose Ramos Horta kondekora Grande Kolar Orden Timor Leste ba Samdech Akka Moha Sena Padei Techo HUN SEN, Prezidente Senadu atual no Eis Primeiru-Ministru Reinu Kamboja.
Onra prestijiozu nee, onra nasional aas liu Timor Leste nian, entrega durante Palestra Prezidensial Serie I ho tema “HUN SEN nia Lisaun sira Husi Jenosídiu no Pobreza ba Liberdade no Prosperidade, neebe halao iha Palasiu Prezidensial Nicolau Lobato.
Samdech Akka Moha Sena Padei Techo HUN SEN servi ona nia nasaun ho distinsaun durante dekade haat liu. Hahu husi moris umilde too sai Primeiru Ministru Kamboja neebe servi tempu naruk liu (1985-2023), Samdech Techo HUN SEN iha knaar importante tebes hodi liberta Kamboja husi rejime jenosídiu Khmer Rouge, implementa Akordu Pas Paris, no lidera rekonstrusaun no dezenvolvimentu nasaun nian. Samdech Techo HUN SEN kontinua ninia servisu ba Kamboja nuudar Prezidente Konselhu Privadu no eleitu ona nuudar Prezidente Senadu iha fulan-abril tinan 2024,haforte ninia legadu nuudar estadista influente liu ida iha Azia no arkitetu xave ida ba renasimentu modernu Kamboja nian.
Iha ninia diskursu abertura iha Palestra Prezidensial 2025 Serie I, iha palasiu Prezidensial Sesta nee (09/05/2025) Prezidente Ramoa Horta destaka viajen estraordinaria HUN SEN nian no lisaun folin-boot sira neebe Timor Leste bele aprende husi Kamboja nia esperiensia kona-ba rekonstrusaun pos-konflitu.
”Exelensia, ita boot nia viajen moris hahu husi funu no estragus neebe makaas too rekonstrusaun nasaun ida inkorpora kbiit rezilensial, lideransa no vizaun,” afirma Prezidente Ramos Horta.
Prezidente dehan, transformasaun Kamboja husi jenosídiu no pobreza estrema ba nasaun ida iha dalan estabilidade no progresu ekonomiku mak evidensia ba forsa povu no polítika sira neebe orienta rekuperasaun notavel ida nee.
Serimonia nee sublina lasu neebe klean liu tan entre nasaun rua neebe partila istoria markadu ho konflitu no rekonstrusaun pos-konflitu.
Timor Leste rekonese papel fundamental HUN SEN nian hodi hametin relasaun bilateral sira no ninia kontribuisaun ba prosesu harii pas neebe oferese lisaun valorozu kona-ba alkansa estabilidadefundamental ba dezenvolvimentu nasional.
Iha ninia diskursu prinsipal, Samdech Techo HUN SEN partila viajen notavel Kamboja nian husi “Tinan Zero” devastador jenosídiu Khmer Rouge too alkansa pas no dezenvolvimentu sustendadus.
Nia sublina importansia husi ninia Polítika Manan-Manan, neebe ho susesu hakotu funu sivíl besik dekada tolu laho ran fakar liu husi integrasaun pasífika.
”Hau sente orgulhu tebes sai ema ida neebe hahu luta ho ema haat deit atu liberta ami nia nasaun kiak husi rejime jenosídiu neebe brutal, uza hau-nia moris rasik hanesan kapital, hau nia konsiensia patriotiku neebe boot hanesan forsa korajen, no hau nia matenek hanesan kompas orientador ida,” katak nia.
Samdech Techo HUN SEN afirma. Ba nia povu Kamboja, pas mak iha folin boot liu no tenke proteje ho kustu saida deit. nia komprende katak hahu funu bele fasil, maibe harii no mantein pas nee difisil tebes.
Samdech Techo HUN SEN destaka lisaun krítiku tolu husi esperiensia Kamboja nian “Primeiru, propriedade ba nasaun nia destinu mak riku-soin neebe folin-boot liu hodi prezerva unidade nasional. Bainhira nasaun ida lakon propriedade ninia destinu rasik, inevitavelmente sei sofre divizaun no dezastre.
Segundu, komunidade internasional tenke servisu hamutuk hodi salvaguarda pas neebe eziste, mesmu ho kustu boot, duke buka ka harii pas neebe lakon ona. Terseiru, mesmu pas alkansa ona, sei la dura tempu naruk sein unifikasaun nasional, rekonsiliasaun, justisa sosial, no dezenvolvimentu sustentavel no inkluzivu.”
Palestra Prezidensial nee moderadu husi Ministru Prezidensia Konselhu Ministrus, Sr. Agio Pereira, ho lia menon enseramentu husi Primeiru-Ministru S.E. Kay Rala Xanana Gusmão.
Primeiru Ministru sublina mensajen solidariedade no rezilensial, hodi dehan katak Timoroan sira la mesak iha esperiensia terus.
“Iha ita nia rejiaun, povu barak hasoru ona funu, dezlokasaun no lakon. No ita rekonese lider sira-neebe lori todan istoria, neebe hatudu korajen no vizaun no neebe ajuda sira-nia nasaun husi konflitu ba pas no husi frajilidade ba forsa.” Katak nia.
Primeiru Ministru aumenta, “Prezidente HUN SEN, ita boot tenke orgullu ho istoria neebe ita-boot konta mai ami ohin kona-ba oinsa ita-boot uza metodu pasifika sira hodi lori pas no rekonsiliasaun nasional hafoin períodu trajedia, divizaun no jenosídiu.”
Vizita ofisial daruak husi Samdech Techo HUN SEN mai Timor Leste dezde 2016 marka etapa signifikativu ida hodi hametin lasu amizade no kooperasaun entre Kamboja no Timor Leste. Relasaun bilateral kontinua dezenvolve liu husi respeitu mutuu no aspirasaun hamutuk ba pas, estabilidade, no prosperidade iha rejiaun.
Samdech Akka Moha Sena Padei Techo HUN SEN no membru sira delegasaun Kamboja nian remata sira nia vizita ofisial mai Timor Leste iha loron 9 fulan Maiu tinan 2025.
(eme)
