DILI, STLTIMORLESTE.com – Estudantes ensinu baziku husi Nobel da Paz, durante fulan hitu (7) nia laran la asesu programa merenda eskolar, tanba seidauk hetan apoiu programa nee husi Ministeriu Edukasaun (ME).
Lia hirak nee hatoo husi Fundador Eskola Nobel da Paz, Jeremias P. de Jesus ba STL iha nia knaar fatin, Sesta nee (17/07/2026).
Nia hatete, too ohin loron estudantes ensinu baziku husi Nobel da Paz la asesu programa merenda eskolar, tanba too agora seidauk hetan apoiu programa hee husi ME, inklui konsesaun eskolar neebe too agora eskola Nobel rasik la hetan.
“Hau hanoin dezde iha fulan Janeiru too mai Fulan Julhu klaran ona nee, ami nian estudantes husi eskola ida nee la asesu ba programa merenda eskolar, tanba programa refere ami seidauk hetan apoiu husi ita nian Ministériu rasik, iha tinan kotuk nee ami nian estudantes sira asesu programa ida nee, ba tinan ida nee mak sira la han too agora,” dehan nia.
Jeremias hatutan, hahu tama tinan 2026 nee estudantes ensinu baziku Nobel la han, eskola Nobel hanesan eskola privadu ida, maske iha tinan kotuk hetan apoiu programa merenda eskolar husi governu liu husi ME, maibe hahu inisiu tinan 2026 too agora sira nian estudantes sira kada loron mai eskola la asesu ba programa refere.
“Maibe ida nee kompetensia Ministeriu nian, oinsa mak atu bele fo apoiu programa merenda eskolar ba estudantes sira iha eskola privadu sira, tanba ami laos la hetan deit merenda maibe konsesaun eskolar mos, tanba nee bainhira ami rezolve hotu ami nian problema eskola ninia, ho nunee ami bele hetan apoiu husi ME liu husi Edukasaun Munisipiu Dili,” katak nia.
Tuir nia katak, maske eskola nobel hanesan eskola privadu ida, maibe kada tinan nee povu barak nia oan mak asesu edukasaun formal iha eskola ida nee, numeru estudantes kada tinan hahu husi Ensinu Baziku no sekundariu sempre aumenta.
Entretantu Francisca de Jesus Borgues nuudar estudante ensinu baziku Nobel da Paz hatete, los duni katak durante nee sira la han merenda eskolar, iha tinan kotuk nee sira hetan programa ida nee, kada loron sira han tuir oras neebe mak iha, maibe ba tinan ida nee sira la asesu ona programa ida nee.
(jac)
