DILI, STLTIMORLESTE.com – Governu Dekreta 26 Junhu hanesan loron feriadu nasional, hodi fo tempu ba sidadaun hotu-hotu atu partisipa iha funebre ba saudozu eis Prezidente Republika Francisco Guterres “Lú-Olo”.
“Toleransia pontu iha loron 26 Junhu tanba Serimonia Funebre ba Eis-Prezidente Republika Francisco Guterres “Lu-Olo”,” haktuir nota komunikadu imprensa neebe STL asesu husi governu, Kinta (25/06/2026).
Tuir alinea d husi n.º 6 artigu 7.º husi Lei n.º 10/2005, loron 10 Agostu, neebe altera ona husi Lei n.º 3/2016, loron 25 Maiu, no Lei n.º 10/2023, loron 5 Abril, kompetensia atu fo toleransia pontu ba “funsionariu no ajente ministeriu sira ka servisu sira neebe depende ba ministeriu sira nee, nunee mos institutu no organismo sira neebe integra administrasaun indireta Estadu nian neebe pertense ba Primeiru Ministru.
Nunee, tuir dispozisaun alinea b) husi n.º 2 no alínea d) hosi n.º 6 artigu 7.º hosi Lei n.º 10/2005, loron 10 Agostu, neebe altera ona hosi Lei n.º 3/2016, loron 25 Maiu, no Lei n.º 10/2023, loron 5 Abril, Primeiru Ministru em Exercisiu determina hanesan tuir mai, konsede toleransia pontu iha loron 26 Junu 2026 durante loron tomak.
“Despaxu ida nee aplika ba funsionariu, ajente no traballador hotu-hotu neebe halao atividade iha servisu sira administrasaun direta Estadu nian, tantu sentral ka desconcentradu, no mos iha organismo sira administrasaun indireta nian,” dehan nia.
Francisco Guterres, neebe konesidu liu ho naran “Lu-Olo”, nuudar eis-Prezidente Parlamentu Nasional no eis-Prezidente Republika entre tinan 2017 no 2022, mate iha loron 21 Junu 2026, iha Malazia;
Lu-Olo nia dalan politika liga metin ho luta ba independensia Timor-Leste nian no, durante administrasaun portuges iha territoriu nee, nia partisipa ona iha movimentu nasional sira.
“Rekonhese katak, durante tinan sira okupasaun indonezia nian, Lu Olo halao knaar lideransa politika oioin iha movimentu rezistensia ba libertasaun nasional, no sai nuudar ida husi figura influente sira iha luta ba libertasaun nasional,” sita husi komunikadu.
Hafoin Restaurasaun Independensia, iha Maiu 2002, Lu-Olo sai nuudar Prezidente dahuluk ba Parlamentu Nasionall no, iha tinan 2017, hili nia ba Prezidente Republika Demokratika Timor-Leste.
Entretantu serimonia funebre ba saudozu sei realiza iha loron 26 Junu, iha Jardim dos Herois, Metinaro.
(alb)
