DILI, STLTIMORLESTE.com – Funu nain sira husu Governu seriu hodi investe ba stor saude, tanba funu nain sira ba halo tratamentu iha rai liur laos fila ho saude rekuperadu, maibe fila ho kaisaun.
“Laran nee triste teb-tebes wanhira haree Saudozu Francisco Guterres Lu-Olo neebe ba ho hamnasa no kondisaun diak fila ho kaisaun, tanba nee Governu tenke hadia setor saude iha ita nia rai laran,” hatete Veteranus Costantino Ximenes kodiku “Nehek Metan” Ponta Leste ba jornalista STL liu husi telefone iha nia rezidensia Munisipiu Lautem, Kuarta (24/06/2026).
Nia esplika, uluk iha tempu funu kartus musan tama isin lolon la mate, tanba saida ukun aan buat hotu lao diak povu mate barak, tanba kualidade saude ladun masimu.
“Ita haree ba dezenvolvementu estrada diak lao kapas, no povu la tur iha nakukun laran , setor saude sei nafatin hakdasak no povu mate barak no funu nain sira mate barak,” nia informa.
Iha fatin seluk, Eis Segurasan Pesoal Saudozu Lu-Olo, Domingos Soares Sarmento “Ramelito” koalia, atu fo prioridade ba setor Saude iha Timor Leste, ho garante saude neebe dignu ba povu Timor Leste.
“Agora buat hotu-hotu halai ba rai liu, ita ba mak akontese hanesan nee, tanba nee ita husu para Ministra Saude tenke hadia stor saude atu nee tratamentu iha rai laran ho diknu,”nia tenik.
Nia triste tanba Saudozu Francisco Guterres Lu-Olo ba ho kondisaun diak fila mai ho kaizaun ,ida neebe laran triste,tanba nee Governu tenke hadia kualidade stor saude iha Timor-Leste (TL) atu nunee povu halo tratamentu iha nee.
Nunee mos ,Eis Segurasan Pesoal Saudozu Francisco Guterres Lu-Olo nian rekomenda ba Governu atu fo Prioridade hodi hadia stor saude iha iha Timor-Leste (TL).
Eis Soldadu Koronel Joao Silva”Sadia Rasik Laek” dehan,realsiona felismentu Saudozu Francisco Guterres Lu-Olo nian , tanba Saudozu desloka husi Timor-Leste ba Malaysia ho kondisaun diak ,maibe fila ho kaixaun.Tanba nee Governu tenke halo avaliasaun setor saude iha Timor-Leste,hodi fo tratamentu saude diak ba sidadaun sira no evita sidadaun sira atu halo tratamentu iha rai liur.
“Ba hau tratamentu iha rai liur neeba dala rua, iha 2022 no 2023 mos hau ba, hau laos lakohi, maibe hau limita la ba ona, mais hau nia maluk sira seluk hau la hatene, hau mate mos dalan mak ida nee deit, duke hau ba kua hau nia laran hotu nee hau para lai, hau uza tradisional no tratamentu iha nee,” nia afirma.
(jen)
