DILI, STLTIMORLESTE.com – Golu Cristiano Ronaldo lori Portugal hatudu dominansia total ho vitória 5-0 kontra Uzbekistan iha Kopa Mundial FIFA 2026, rezultadu neebe ho forsa boot taka kedas adeptu Argentina nia ibun iha Timor Leste no hamosu frustrasaun ba sira.
Vitoria dominante nee sai nuudar resposta definitiva husi ekipa Roberto Martinez nian hafoin sira hetan deit empata 1-1 kontra DR Kongo iha jogu primeiru. Ho rezultadu 5-0 nee, Portugal konsege hasae sira nia diferensia golu no hametin pozisaun iha grupu K.
Durante jogu nee Cristiano Ronaldo hatudu prestaun istoriku ho golu rua (2) minutu 6 no 39, neebe halo nia sai primeiru jogador iha istoria neebe marka golu iha edisaun 6 FIFA World Cup. Golu seluk mai hosi Nuno Mendes liu husi tiru livre, Rafael Leão neebe hatutan golu kintu, no Uzbekistan nia guarda-redes, Abduvohid Nematov, neebe hatama golu kontra. Portugal domina 66% kontrolu bola ho total finalizasaun sira neebe fo presaun makas ba Uzbekistan nia bloku protetor.
Iha Timor-Leste, vitoria nee sai nuudar topik debate neebe akontese iha fatin publiku no sentru konversasaun sira. Adeptu sira husi bloku Argentina neebe antes nee uza oportunidade hodi kestiona Portugal nia frakeza, agora tenke hasoru realidade teknika husi ekipa Portugal. Frustrasaun nee sai klaru tebes tanba sira nia esperansa atu haree Portugal monu iha faze grupu la akontese.
Rezultadu nee sai hanoin foun ba Portugal hodi asegura fatin iha faze tuir mai, enkuantu Uzbekistan sei hasoru situasaun difisil atu kontinua sira nia jornada his kompetisaun ida nee.
Konaba vitoria nee, Adeptu Portugal iha Timor-Leste, Eduardo de Araújo hatete katak, golu neebe Cristiano Ronaldo hatama nee taka kedan Adeptu Argentina iha Timor-Leste nia ibun.”Ita haree golu sira nee, taka kedan Adeptu Argentina sira nia ibun, tanba sira labele koalia ona konaba Portugal nia kualidade.”dehan Eduardo ba STL, Kuarta nee (24/06/2026).
Nia hatutan tan katak, ho vittoria neebe hatudu dominasaun boot nee Adeptu Argentina sira iha Timor-Leste aumenta tan frustrasaun, tanba sira nia ídolu sei la hetan rezultadu neebe neebe hanesan ho Portugal.
“Hau hanoin ho vitoria nee nuudar prova ida katak, Portugal sei iha potensial boot hodi kompete iha Kopa Mundial ida nee,” Eduardo hatete.
(car)
