DILI, STLTIMORLESTE.com – Estadu ka Governu abandona povu iha nia rai rasik, tanba uma kain 104 iha Kampung Alor, Dili, moris susar hafoin eviksaun Juñu 2026 la ho kompensasaun.
Eviksaun hala’o hodi fo fatin ba infraestrutura publika iha Dili, maibe husik komunidade moris vulneravel laiha uma no rendimentu.
To’o agora laiha solusaun klaru husi Governu ba vitima sira, maske promesa konaba indemnizasaun fó tiha ona antes eviksaun akontese.
Observador Politiku, Roberto de Araujo, konsidera situasaun Kampung Alor hatudu falhansu planeamentu, no jestaun sosial husi Governu nian.
“Ita haree katak, kestaun eviksaun laho indemnizasaun ne’e bele haree husi perspetiva oioin ne’ebe hatudu urjensia, no prova katak Estadu abandona povu iha nia rai rasik,” dehan Roberto ba STL, iha Dili, Kuarta (30/09/2026)
Nia subliña, Governu tenke tuir rekerimentu legal no internasional, ne’ebe ezije kompensasaun ka relokasaun prontu antes asaun fiziku hasai komunidade.
Roberto kritika, koordenasaun entre ministeriu infraestrutura no asuntu sosial sei fraku tebes, tanba eviksaun laho preparasaun kompensasaun klaru.
Nia afirma, atrazu fo indemnizasaun fo impaktu negativu ba labarik nia edukasaun, saude familia no estabilidade ekonomika komunidade lokal ne’ebe lakon hela fatin.
Nia rekomenda Governu kria ekipa servisu konjunta ho urjente, hodi verifika dadus uma kain 104 no fahe indemnizasaun ho transparansia hodi hasai krize.
Iha parte seluk, vitima eviksaun Kampung Alor, José da Conceição, hato’o familia sira hela deit iha uma neebe la dignu ka hamahon-an iha pariente nia uma.
“Antes ne’e Governu promete atu rezolve kompensasaun ho lalais, maibe to’o fulan tolu liutiha laiha sinál ka informasaun klaru,” dehan José.
Nia hateten, familia barak lakon kbiit ekonomika no rendimentu loron-loron, tanba sasan estragadu no fatin negosiu kiik rahun tanba eviksaun.
Jose husu, Governu no Parlamentu Nasional lalika halo politika ba sira nia sofrimentu, maibe hare sira hanesan sidadaun ne’ebe presiza proteksaun justu.
Entretantu Deputada Bankada FRETILIN, Cristina Yuri Rebelo hatete katak, família sira-ne’e koopera ona ho Governu hodi apoia projetu dezenvolvimentu nasionál, inklui hodi fó rai ba Estadu.
Nia afirma, Governu iha responsabilidade atu garante direitu komunidade sira ne’ebé afetadu hosi eviksaun, liuliu bainhira rai ne’ebé sira hela ba ne’e uza ba interese públiku.
Tuir informasaun ne’ebé deputada ne’e aprezenta iha plenária Parlamentu Nasionál, uma kain 104 ho populasaun hamutuk ema 850, inklui labarik, inan-aman no ferik-katuas, hetan impaktu hosi eviksaun iha Suku Kampung Alor, Aldeia Hamahun, entre 23 Juñu no 3 Jullu 2026.
“Família sira relata katak iha promessa kona-ba pagamentu indemnizasaun iha prazu badak, maibé to’o agora seidauk simu sira-nia direitu,” hatete Deputada Cristina.
(car)
