DILI, STLTIMORLESTE.com – Konselhu Ministrus aprova projetu Rezolusaun Governu, neebe aprezenta husi Ministru Interior (MI), Francisco da Costa Guterres, kona-ba definisaun nesesidade anual husi pesoal neebe sei rekruta ba Polisia Nasional Timor-Leste (PNTL) iha tinan 2026.
“Rezolusaun Governu nian estabelese ba 350 numeru vaga adisional neebe sei rekruta husi PNTL iha tinan 2026, neebe aumenta ba vaga 400 neebe antes nee aprova ona ba admisaun iha Kursu Formasaun Ajente, hodi aumenta total vaga 750,” haktuir nota Komunikadu neebe STL asesu husi Governu, Kuarta nee (03/06/2026)
Husi vaga sira neebe prevee ona, 400 destina ba polisiamentu jeral neebe asegura husi Komando Munisipal sira no 350 ba reforsu Unidade Espesializada no Rezerva PNTL nian, hanesan Unidade Polisia Maritima, Unidade Patrulhamentu Fronteira no Unidade Espesial Polisia.
Medida ida nee ho objetivu atu hametin kapasidade operasional PNTL nian, atu hatan ba nesesidade seguransa nasional, hodi konsidera dezafiu sira neebe relasiona ho prosesu eleitoral sira neebe sei mai, protesaun fronteira no Timor Leste nia Prezidensia ba ASEAN iha tinan 2029.
(alb)
