DILI, STLTIMORLESTE.com – Bainhira debate Orsamentu Jeral Estadu (OJE) iha Dotasaun Jeral Estadu, Governu aseita proposta alterasaun hasai milhaun US$ 1 husi g7+, hodi aloka ba viajen lokal F-FDTL no Komite Orientador 25.
Liu husi debate proposta OJE 2025, iha Dotasaun Jeral Estadu, Deputadu sira hatoo proposta alterasaun 9, husi nee 2 governu aseita, no ida proponete retirada, 5 seluk Governu la aseita tama ba votasaun.
Husi 2 neebe governu aseita mak hanesan numeru 12 no numeru 71, neebe atu foti osan husi Dotasaun Jeral Estadu iha programa Politika Externa Timor Leste, husi g7+ neebe aloka US$ 3.000.000, hodi hasai tiha US$1.000.000, hodi apoia ba FALINTIL Forsa Defeza Timor Leste sira nia viajen lokal ho montante rihun US$ 250, nunee mos rihun US$ 750 ba apoia Komite Orientador 25.
Proposta alterasaun nee ho numeru 71 proponente mai husi Deputada Liadia Martins, Maria Angelina, Antoninho Bianco, enkuantu proposta altersaun 12 proponente husi Deputada Angelina Sarmento, Maria Angelica, Natalino dos Santos.
Hafoin rona razaun husi proposta sira, Primeiru Ministru, Kay Rala Xanana Gusmão hatete, aseita ho proposta alterasaun 2 neebe atu foti osan husi g7+ milhaun US$1 hodi apoia ba viajen lokal F-FDTL no Komite Orientador 25.
Enkuantu proposta altersaun nee maski hetan ona aseitasaun husi governu maibe seidauk halao votasaun husi Deputadu sira, tanba nee votasaun sei halao iha tuku 3 loraik, nunee bele haree rezultadu votasaun pasa ka la pasa.
(gui)
