DILI, STLTIMORLESTE.com – Governu liu husi Gabinete Apoiu Sosesidade Sivíl (GAS) sei Koordena Finalizasaun Obra Igreja Aimutin, maibe presiza sarani Aimutin ho Governu tenke tau orasamentu foun hodi konklui obra refere.
Vise Primeiru Ministru, Ministru Koordenadór ba Asuntu Sosiál, no Ministru Dezenvolvimentu Rurál no Habitasaun Komunitária, Mariano Assanami Sabino hatete, Governu liu-husi GAS sei nomeia direta hodi halo koordenasaun ba finalizasaun obra igreja.
“Obra nee ita sei la hapara no presiza orsamentu foun husi Governu no sarani sira. Tanba nee Governu liu husi Gabinete Apoiu Sosiál (GAS) sei foti responsabilidade direta hodi koordena finalizasaun obra konstrusaun igreja,” hatete Vise Primeiru Ministru, Ministru Koordenadór ba Asuntu Sosiál, no Ministru Dezenvolvimentu Rurál no Habitasaun Komunitária, Mariano Assanami Sabino ba jornalista sira iha Hotel Timor, Kuarta (12/08/2026).
Nia esplika katak, iha ona aprezentasaun no konkordansia ho Kompanhia neebe uluk kaer projetu nee. Tanba iha osan balun neebe seidauk gasta, nia dehan Kompanhia refere bele kontinua obra.
“Ita atu halo konklui obra nee presiza tan orsamentu foun. Ita define ona maibe husi sarani sira no Governu tenke tau tan osan, ida nee mak solusaun,” nia esplika.
Nia mos informa, obra refere seidauk too iha faze investigasaun. Tanba objetivu prinsipál mak atu finaliza igreja, laos atu hapara atividade.
Nia haktuir, se kazu nee entrega ba tribunal signifika atividade sei para.
“Mais tanba ita hakarak koopera, tanba ita nia tarjetu nee igreja nee tenke hotu. Entaun ita bolu mos Kompanhia ho konsiensia rasik oinsa ho Governu para haree. Se ida nee mak dudu ba la ba labele prontu tenke ba,” nia deklara.
Nia koalia tan, konstrusaun nee klean liu ba kraik no fundamentu nee krusial. Tanba ne’e diak liu nafatin Kompanhia neebe uluk halo atu kontinua. Maibé se Kompanhia nee la hakarak ona, Governu sei buka Kompanhia seluk atu substitui.
“Ita sei presiza orsamentu foun. Agora daudaun GAS mak sei haree depois halo koordenasaun orsamentu hira mak tau ba,” nia konklui.
Iha fatin ketak , Akademista UNTL, Julio da Costa esplika, obra Igreja Aimutin lao kleur tebes, tanba nee parte Governu husu ba nain ba projetu nee aselera lalais, tanba sarani sira hakarak hahu fila-fali ba misa ida nee.
“Ita haree obra Igreja Aimutin konstrusaun kleur demias, sei hanesan nee fo ba emprezaria ida eebe hakarak, tanba sarani sira persiza misa iha igreja nee,” afiman.
(jen)
