DILI, STLTIMORLESTE.com – Governu liu husi Sekretaria Estadu ba Igualdade (SEI) kontinua monitoriza grupu feto benefisiáriu sira ne’ebé hetan apoiu fundu rotativu desde 2019.
Diretor-Jerál SEI, Armando da Costa, hatete programa monitorizasaun ne’e kontinua atu haree dezenvolvimentu atividade negósiu grupu benefisiáriu sira.
Nia hato’o informasaun ne’e ba jornalista iha Salaun Maria Goreti Kaikoli, Tersa (06/10/2026), kona-ba implementasaun fundu rotativu no monitorizasaun ba grupu sira.
Armando hatete ekipa SEI kontinua fó formasaun no treinamentu ba grupu benefisiáriu, atu nune’e sira bele jere diak atividade negósiu no finansas.
“Husi fundu rotativu, ita fó formasaun no treinamentu kona-ba negósiu no jestaun finanseira, no ita mos halo vizita regular no monitorizasaun,” hatete Diretor-Jerál SEI.
Nia hatete, SEI mós servisu hamutuk ho parseiru sira, inklui Asosiasaun Feto no Banku Mundial, atu motiva grupu sira dezenvolve negósiu iha kompetisaun saudável.
“Agora dadaun ami laiha fundu transferénsia foun, maibé ami kontinua rota osan ne’ebé sirkula ona iha komunidade,” nia hatete.
Tuir Armando, osan ne’ebé sirkula hela iha grupu feto sira atualmente hamutuk besik US$800 mil, no osan ne’ebé fila ona sei fó fali ba grupu foun.
“Nee ba grupu husi munisípiu 13, inklui RAEOA no Ataúru. Agora dadaun ita iha grupu atus haat resin husi 2019 mai to’o 2025,” nia hatete.
SEI hahú implementa fundu rotativu desde 2019, ho objetivu atu apoia feto no grupu vulnerável sira liuhusi atividade ekonomia ne’ebé bele aumenta rendimentu família.
Entre 2019 no 2023, SEI apoiu ona grupu feto hamutuk 434, liuhusi fundu transferénsia públika ho montante total US$ 776,486. Husi total ne’e, grupu 344 hetan apoiu liuhusi mekanizmu rotativu, ho montante US$ 636,146.
Grupu feto 65 hetan apoiu liuhusi mekanizmu la’ós rotativu, ho montante US$103,913, no grupu feto vulnerável 25 hetan US$36,427.
Atividade ekonomia implementa husi grupu benefisiáriu sira inklui ortikultura, agrikultura, peska, hakiak ikan iha rai maran, no hakiak animál.
Atividade sira seluk inklui hakiak manu, karau, fahi no bibi, pakotamentu no prosesamentu ai-han, artezanatu, soru no kioske.
SEI mós apoia atividade sira seluk ne’ebé iha objetivu atu promove igualdade jéneru no empoderamentu ekonomia feto iha komunidade.
Ba tinan 2026, SEI la aloka fundu transferénsia foun ba programa ne’e, maibé kontinua monitoriza grupu sira ne’ebé antes hetan ona apoiu.
Monitorizasaun ne’e importante atu asegura osan rotativu ne’ebé sirkula iha komunidade bele uza ho responsabilidade no kontinua fó benefísiu ba grupu feto sira.
SEI espera, mekanizmu rotativu bele ajuda grupu feto sira hametin atividade negósiu, aumenta rendimentu no sai independente liuhusi oportunidade ekonomia iha munisípiu hotu.
(eme)
