DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu kontinua suspende atividade Grupu Arte Marsiais (GAM) no Grupu Arte Rituais (AR) too loron 31 fulan Dezembru tinan nee.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (05/06/2026).
Iha biban nee Primeiru Ministru informa ba Prezidente Republika katak situasaun iha rai laran lao normal maske iha krime balun neebe ema balun malu maibe lahanesan ho tinan hira ba kotuk konaba grupu arte marseias asalta malu no seluk tan.
“Hau mos hatete ba Prezidente katak too agora ita krime normais ema ida ho ida, iha baku ida mais buat seluk hanesan uluk neebe ita rona katak ligadu ba arte marsiais nee menus liu la mosu hanesan uluk babain maibe haree katak 2027 sei eleisaun Prezidensial eleisaun iha fatin balun tanba nee mak Governu deside atu prolonga too 31 dezembru 2026, suspende treinu pratika hodi labele provoka fila fali,” dehan PM Xanana.
Iha biban nee Prezidente Republika Jose Ramos Horta hatoo apresia ba povu Timor Leste tanba bele kria situasaun neebe hakmatek iha komemorasaun Indepedensia ba dala 24 iha 20 Maiu situasaun lao hakmatek.
“Prezidente mos apresia teb-tebes iha 20 maiu buat ida la akontese Iwan Fals mai mos buat ida la akontese, ita sente katak loron hirak nee povu liu liu joven sira bele lao ba lao mai la akontese buat ida, “ karak PM.
“Hau informa mos katak iha sebu iha simeira asean iha Sebu karta ASEAN antes de Timor tama no too iha sebu mos iha karta asean nia la mensiona Timor leste neebe iha sebu nee ami halo rezolusaun ida atu hadia tiha karta asean nia hodi tau mos timor nuudar membru foun,” katak PM.
Primeiru Ministru hatete, iha Kuarta feira Governu liu husi Konselhu Ministru aprova tiha ona atu haruka ba parlamentu nasional hodi ratifika tiha karta ASEAN foun nunee Timor mos partisipa nuudar membru.
Iha Kuarta nee Konselhu Ministrus halao sorumutu iha Palasiu Governu, Dili, no aprova ona projetu Rezolusaun Governu nian, neebe hanaruk, too loron 31 fulan-dezembru tinan 2026, períodu vijensia suspensaun ba ensinu, aprendizajen no pratika arte marsial, no mos enserramentu temporariu ba fatin no instalasaun hothotu neebe utiliza ba ensinu, aprendizajen no pratika arte marsial.
Desizaun nee kontinua Rezolusaun Governu n. 45/2023, loron 10 fulan-novembru, neebe prolonga ona tuituir malu liuhosi Rezolusaun n. 17/2024, loron 24 fulan-abril, n. 60/2024, loron 7 fulan-novembru, n. 22/2025, loron 7 fulan-abril no n. 77/2025, loron 17 fulan-dezembru. Presupostu sira neebe justifika suspensaun nee vigora nafatin, liuliu nesesidade atu hametin dame sosial neebe hetan ona dezde fulan-novembru 2023 no atu garante katak pratika arte marsial sei bele halo deit iha kontestu desportivu, hodi kontribui ba formasaun sívika no umanista ba joven sira.
(eme)
