DILI, STLTIMORLESTE.com – Governu ofisialmente lansa ona komersializasaun ba Kabu Fibra Otika iha Timor Leste.
Primeiru Ministru (PM), Kay Rala Xanana Gusmão hateten, lansamentu operasaun ba komersializasaun ba Fibra Otika iha Timor Leste importante tebe-tebes ba dezenvolvimentu sistema nasional telekomunikasaun.
“Ohin, ita fo tan passu importante ida, ho inisiu operasaun komersial husi ativu nasional nee husi Cabus de Timor Leste. Nee signifika katak ita nia nasaun la depende barak ona ba ligaosoens husi satelite ho radio, neebe karun no ladun fiaveis,” hatete PM Xanana, iha ambitu lansamentu Komersializasaun Fibra Otika iha Bebonuk, Tersa (28/07/2026).
Xefe Governu hatutan, lansamentu Fibra Otika nee ba oin Timor Leste sei asessu ba kapasidade internet neebe boot liu no proporsional baze ba servisu internet lais liu, fiaveis liu no acessiveis liu.
Nia dehan, durante nee Timor Leste atu asesu ba situasaun global depende deit ba iha teknolojia satelite ho radio.
Maibe servisu hirak nee karun tebes, ho kapasidade limitada no bele afeta husi kondisoens meteorolojikas no interrupsoens seluk.
Tanba nee mak Governu deside atu investe iha Kabu Submarino internasional ida husi Fibra Otika.
Desizaun nee reflete vizaun ba longu prazu neebe estabelese ona iha Planu Estratéjiku Dezenvolvimentu ba 2011-2030.
“Planu Estratejiku Dezenvolvimentu rekonhese katak telekomunikasoens modernas essensiais tebes ba dezenvolvimentu ekonomiku, edukasaun, saude, governasaun efikas ho ligasaun entre ita nia populasaun no ho mundu,” nia hakotu.
(alb)
