BAUCAU, STLTIMORLESTE.com – Governu liu husi parte kompetente normaliza ona estrada rural husi Suku Uaigae ba Suku Uatulari, Aldeia Uaiharebo’o, Postu Administrativu Vemasse, Munisipiu Baucau.
Habitante Uaiharebo’o Cleto Freitas Cardoso Faria aprezenta, durante tinan naruk komunidade Uaiharebo’o infrenta kondisaun estrada husi Uaiharebo’o too Suku vizinhu Uaigae kondisaun aat, iha neebe tempu udan difikulta komunidade sira bainhira infrenta moras urujente transporte estadu hanesan ambulansia labele too Aldeia refere, nunee obrigadu komunidade sira tenke hulan. Maibe preokupasaun sira nee iha inisiu fulan Maiu nee Governu responde ona.
“Sira halo tiha ona normalizasaun taka rai kuak iha rai monu nee mos sira dudu sai hotu tiha ona dalan nee sira taka too ami nia Aldeia,” hateten Cleto ba STL liu husi telefone Kinta (21/05/2026).
Durante servisu neebe habitante nee haree katak, parte relevante neebe atual halo normalizasaun estrada ba Aldeia Uaiharebo’o taka deit kuak sira neebe iha tempu udan, udan been nalihun enkuantu la kee fatin ba valeta.
Nia agradese ba servisu nee, tanba bele reduz ona komunidade Uaiharebo’o nia sofrementu, maibe servisu normalizasaun neebe atual halo sei la dura ba tinan naruk.
“Se udan hela deit estrada nee bele estraga fali deit, tanba saluran fatin sira la halo taka deit kuak nee difikulta nafatin, tanba udan mai bele sobu sai fali deit,” Cleto komenta.
Nia fundamenta, servisu refere gasta orsamentu, tanba nee tenke planu hadia dala ida nunee uza ba tinan naruk. Nunee husu Ministeriu Obras Publikas atu konsidera povu Uaiharebo’o nia preokupasaun liu husi halo reabilitasaun ba estrada husi Uaigae ba Uaiharebo’o inklui konstrui ponte iha mota Rusadi no Kaukete Ana neebe durante tempu udan difikulta estudante sira.
Liga asuntu nee STL tenta komfirma Diretor Servisu Munisipal Obras Publikas Baucau, maibe laiha fatin atu fo komentariu.
Entretantu Aldeia Uaiharebo’o rejistu Xefe familia besik 100 iha neebe atual hela permanente iha Aldeia refere liu uma kain 30 enkuantu restu seluk hela iha Vemasse Vila, tanba kondisaun estrada aat, laiha ponte inklui linha telekomunikasaun.
(alb)
