DILI, STLTIMORLESTE.com – Governu liu husi Ministeriu Komersiu no Industria (MKI) presiza foti asaun urjente hodi intervein lalais presu foos neebe sae makaas iha area rural, tanba komunidade kiik iha baze omesa labele sosa ona foos ho folin neebe karun tebes.
Preokupasaun nee hatoo husi Observador Ekonomia, Romaldo Guterres neebe hatete katak, foin lalais nee folin foos iha kapital Díli hatudu estabilizasaun, maibe kestaun nee la akontese iha area rural sira. Iha neeba, folin foos kontinua sae nafatin, tanba menus kontrolu no mos tanba kustu transportasaun neebe karun husi sidade ba foho.
“Iha sidade fali bele kontrola, maibe iha foho neeba, povu kiik terus liu tan tanba foos saku ida faan karun tebes. Governu liu husi MKI presiza intervein, lori foos subsidiu ka halo fali operasaun merkadu too iha área rural sira,” dehan Romaldo ba STL iha Kaikoli, Díli, Kuarta (08/07/2026).
Nia dehan, bainhira Governu la foti medidas lalais, situasaun nee bele hamosu fali krizi foun ba kbiit sosa nian no hamenus seguransa aihan ba família sira iha baze.
Atu rezolve kestaun nee Romaldo sujere Ministru Komersiu no Industria (MKI) atu kordena ho parte komersiante sira, hodi fiksa presu padraun ida neebe labele hanehan konsumidor sira iha foho.
Iha fatin ketak Akademista UNTL, Eduardo Sarmeto fo hanoin katak, faktu iha terrenu hatudu beibeik katak dezafiu boot liu ba estabilidae ekonomika iha area rural mak kestaun lojistika no kbiit sosa nian, nunee politik neebe Governu foti tenke bazeia mos ba realidade neebe povu moris ba loroloron.
“Dalan uniku hodi hametin kbiit sosa nian no proteze ita nia povu kiik iha area rural sira mak liu husi monitorizasaun neebe rigorozu ba fiksaun presu iha merkadu, hodi nunee komersiante sira labele aproveita situasaun, hodi buka lukru liu hodi hanehan fali kbiit komunidade nian,” dehan nia.
Iha parte ketak Komunidade Luciano Martins afirma katak, situasaun iha terrenu ladun diak, tanba folin foos aumenta ba bebeik hodi hatodan sira nia moris. ”Ami husu ba Governu atu rona netik ami nia lian, tanba susar tebes ami atu sosa foos ho folin neebe karun ba sustenta familia,” hatete Luciano.
(car)
