DILI, STLTIMORLESTE.com – Governu presiza kontrola lalais presu sasan neebe sae iha foho, tanba situasaun nee komesa fo todan boot ba komunidade kbiit kiik sira, no hamosu dezafiu boot ba moris loron-loron nian iha area rurais.
Observador Ekonomia, Manuel Nunes da Costa hateten, dadus husi Diresaun Nasionál Estatístika hatudu katak inflasaun iha nível nasional hatudu mudansa tuir deit indise normal, maibe realidade iha baze, liu-liu iha foho, folin sasan hanesan foos, mina-sona, masin, no nesesidade loron-loron nian sae aas tebes kompara ho folin iha kapital Dili.
“Komunidade iha foho hasoru dezafiu duplu. Aleinde sira nia rendimentu neebe kiik, sira tenke sosa fali sasan ho folin neebe karun tebes tanba kustu transportasaun no falta kontrolu merkadu husi parte kompetente sira,” dehan Manuel ba STL, Tersa nee (21/07/2026).
Nia dehan, fator prinsipal neebe dudu presu sasan sae iha foho mak kondisaun estrada neebe aat no dook halo transportasaun merkadurisa sae aas ka karun, nunee negosiante sira husi foho tenke hasae folin atu kobre kustu sira nee no mos falta intervensaun direta husi Governu hodi kontrola marjen lukru husi negosiante boot no negosiante kii sira.
“Ita husu ba Governu tenke define limite folin ba sasan importante sira hanesan buat neebe hala’o ona ba kombustivel. No mantein prezensa inspesaun nian (hanesan AIFAESA) lais deit iha Dili maibe toko mos iha munisípiu no postu administrativu sira,” dehan nia.
Kona-ba kestaun nee, Akademista husi Universidade da Paz (UNPAZ), Raimundo da Silva fo hanoin katak, kbiit sosa neebe tun iha foho bele hamosu problema foun hanesan malnutrisaun no hamonu kualidade moris povu nian. Nia subliña katak estabilidade ekonomika neebe loos mak bainhira dezenvolvimentu no kbiit sosa lao hanesan, laos deit ba sidadaun iha sidade, maibé tenke too mos ba povu kiik sira iha foho.
Entretantu membru komunidade husi foho, José Soares lamenta tebes ho situasaun nee tanba sira tenke faan sira nia produtu lokal ho folin baratu, maibe sosa fali sasan nesesidade baziku husi sidade ho folin neebe sae signifikativu tebes. Nia husu tebes ba Governu atu lalais buka solusaun, nunee povu kiik iha area rurais mos bele goza moris neebe dignu no kbiit sosa neebe ekilibradu.
(car)
