DILI, STLTIMORLESTE.com – Governu liu husi Ministeriu relevante presiza halao sosializasaun kona-ba lei protesaun ba labarik iha sosiedade, tanba labarik barak sei moris iha violensia nia laran.
Labarik barak seidauk goza sira nia direitu ho lo-loos hanesan labarik, nunee halo juventude feto neebe luta ba direitu labarik, Maria Amaral husu ba Governu liu husi Ministeriu relevante sira presiza servisu hamutuk, hodi halo sosializasaun ba lei refere ba komunidade atu nunee sira bele hatene.
“Sosializasaun nee labele halo iha munisipiu deit, maibe ba too iha munisipiu liu-liu ba iha area remotas sira oinsa mak esplika kona-ba lei protesaun ba labarik nee halo nusa, nunee lsira mos bele sente moris hakmatek no goza mos sira nia direitu,” dehan Maria ba STL iha nia servisu fatin Kaikoli, Dili, Segunda nee (21/10/2024).
Maibe nia dehan, lei violensia domestika ema barak hatene ona, maibe barak mos seidauk hatene, tanba nee husu nafatin halao sosializasaun.
“Ita haree foin lalais labarik nain 3 halai sai husi Asrama liu-liu fatin hakmatek iha Baukau, tanba hetan baku husi nia maluk sira no seluk tan, ida nee ita presiza tau assuntu seriu hodi bele buka dalan prevene iha future liu husi formasaun iha eskola sira,” katak nia.
Hatan ba kestaun nee, Diretora Diresaun Nasional Reinsesaun Komunitariu (DNRC) husi MCCI, Manuela Oliveira hatete, sira servisu hamutuk ho UN Women TAF halo hela protesaun labarik no kapasitasaun sira lao namanas, daudaun nee iha Munispiu Bobonaro, Postu Balibo halo hela protesaun ba labarik iha perigu ba inan aman no komundade no estudante ho entidade relevante sira.
“Semana kotuk mos iha treinamentu ba parte Leste nia liga ba PPO prosedimentu violensia bazeia ba jeneru nia kestaun kazu ba iha Vikeke, Baukau, Lospalos, Manatuto no Lautem, no agora daudaun ita iha hela faze preparasaun ida establesimentu linha Frontline, ami avansa ho politika linha frontiline maibe too iha Konselhu Ministru husu ita halo mudansa no aprezenta ho dekretu lei ida para todan nee iha bainhira estabelese no implementa,” katak nia.
Tuir nia, lei protesaun labarik nee estabelese no vigora ona iha fulan Agostu tinan 2013, hahu husi entrada no em vigor nee MCCI hola kedas nia papel hodi fo formasaun liga ba assuntu labarik.
(eme)
