AMBENO, STLTIMORLESTE.com – Prezidente Konselhu Administrasaun Fundu Espesial Dezenvolvimentu (KAFED), Samuel Marcal esklarese ba publiku, liga ho estudante bolseiru rai liur hamutuk 11 iha Jakarta-Indonezia nomos bolseiru rai laran neebe selesionadu husi Rejiaun Administrativa Espesial Oecusse-Ambeno (RAEOA), daudaun prosesa ona propinas ho alojamentu.
Ministru Obra Publika (MOP), Samuel Marcal atual Prezidente Konselhu Administrasaun Fundu Espesial Dezenvolvimentu (KAFED) dehan, Fundu Dezenvolvimentu Kapital Humanu (FDCH) foin daudaun nee mak kria sekretariadu nee, sistema mak foin komesa lao, neebe seidauk too fulan, foin mak hetan asesu ba sistema.
“Ohin hau rona dehan katak hahu halo ona transferensia orsamentu, ita buka rezolve, tanba ida nee situasaun ida neebe mak ita infrenta no tenta rezolve situasaun nee, espera katak tinan oin mai fali buat hotu bele lao diak ona. Hau atu dehan ba ita katak, ita hadia ponte ho Estrada nee mais fasil, maibe atu hadia instituisaun, reforma instituisaun, reforma iha sistema nee, laos buat ida fasil, ida nee presiza tempu, pasiensia no presiza iha vizaun duni para bele hametin ita nia sistema, hametin ita nia instituisaun sira, ita atrazu uitoan, maibe ita fiar katak, sistema nee diak, ita bele lao ba oin,” dehan Ministru Obra Publika (MOP), Samuel Marcal, atual Prezidente Konselhu Administrasaun Fundu Espesial Dezenvolvimentu (KAFED) ba STL iha Salaun Gabinete PA-RAEOA Oebau, Suku Costa, Postu Administrativu Pantemakassar, RAEOA, Sesta (05/06/2026).
Liu husi fundu FED, Autoridade RAEOA asina ona kontratu bolus estudu ba estranjeiru hamutuk bolseiru 11, neebe daudaun nee halao hela estudu Institutu Pariwisata Trisakti, Jakarta, Indonesia, atu kontinua sira nia estudu ho nivel Lisensiatura (S1) no Mestradu (S2).
Iha oportunidade nee, Prezidente Autoridade RAEOA, Regio da Cruz Salu hatene ezijiensia estudante bolseiru nain 11 iha Jakarta inklui balun iha rai laran. problema laos RAEOA maka abandona, maibe tanba mudansa estrutura RAEOA hodi pendente prosesu barak.
“Hau hakarak klarifika iha nee katak, Autoridade asina sira nia proposta, ita nia obrigasaun atu selu sira-nia transferensia iha fulan Marsu liu ba, maibe iha momentu neeba hau moras, Prezidente Interinu kontinua prosesu nee, maibe Diretora Finansa momentu neeba seidauk tama serbisu tanba mudansa estrutura RAEOA, entaun ida nee maka halo pendente ba prosesu, maibe aprovasaun nee iha Marsu liu ba, neebe bainhira hau retoma hikas funsaun hanesan Prezidente Autoridade, prosesu nee tarde uitoan tanba Diresaun Rejional Finansa foun ho sistema foun no hetan espesimentu iha serbisu Sistema Government Resource Planning (JRP), neebe iha loron 31 Marsu 2026 sesa hotu, tanba nee serbisu maioria iha administrasaun publika Oecusse funsionariu kazuais,” dehan nia.
Nia dehan, bainhira renova ona kontratu depois diretora Finansa foun foin simu pose iha loron 28 Abril, entaun serbisu hahu inisiu Maiu, maibe ohin asina ona pedidu transferensia osan nee, neebe atu klarifika katak, laos RAEOA abandona estudante sira, maibe tanba mudansa estrutura maka akontese iha Oecusse.
Antes nee bolseiru 11 hatoo sira nia preokupasaun liu husi konfrensia imprensa iha Jakarta, loron 16 Maiu 2026 katak, Autoridade RAEOA, haruka hodi kontinua sira nia estudu iha Institutu Pariwisata Trisakti Jakarta Indonesia, triste no preokupa tanba Autoridade RAEOA sente abandona no la halo pagamentu propina ba segundu periodu inklui alozamentu durante fulan 2 ona, husi fulan Abril too Maiu 2026.
Estudante nain-11, husu atu governu seriu trata pagamentu propina ho alojamentu ho preokupasaun hanesan Pagamentu ba propinas segundu periodu, Mestrado (S2) nain 5 ho total pagamentu mak Rp112.500.000, Lisensiatura (S1) nain 6) ho total pagamentu mak Rp73.000.000, Pagamentu ba alojamentu segundu periodu, S2 ema 5 ho total pagamentu US$15.500, S1 ema nain 6 ho total pagamentu mak US$ 18.600.
(jos)
