DILI, STLTIMORLESTE.com – Jurista Timoroan konsidera nesesariu tebes governu aprova dekretu lei ida, hodi halao rekrutamentu ba Majistradu Juiz, Prokurador no Defensor Publiku estranjeiru sira, hodi mai reforsa servisu Justisa iha Timor Leste.
Tuir Jurista Sergio Dias Quintas katak, problema justisa tenke rezolve fazeadamente, liu-liu kona-ba rekursu umanu neebe mak ohin loron ita seidauk atinji metas neebe ita hakarak, liu-liu numeru Juiz, Prokurador no Defensor Publiku, numeru nee seidauk sufisiente, tanba nee nesesariu halo rekruta ba Majistradu Internasional sira.
“Nesariu tebes politika Governu nian atu halo rekrutamentu ba Majistradu Estranjeiru sira, maibe mak nee, Majistradu Estranjeiru sira nee mai atu fortifika no fortalese sistema neebe mak iha, mai para atu implementa deit lei Timor nian,” dehan Jurista Sergio ba STL, iha Tribunal Primera Instansia Dili, Kaikoli, Tersa (17/12/2024).
Nia hatutan, numeru Majistradu Juiz, Prokurador no Defensor Publiku sira sei limitadu, no sira mai atu kompleta deit, too tempu ida Governu mos haree kondisaun Timor Leste hamriik ona katak, halo Justisa nee efetivu no efisiente too tempu ida sira tenke fila ona,” ita presiza kaer rasik ita nia justisa no poder soberania iha ita nia rain rasik mak Judisial labele interven husi ema estranjeiru,” dehan nia.
Jurista nee afirma, rekursu umanu sei limitadu, politika Governu nian atu fortalese fortifika deit setor justisa. Lei organizasaun Judisial nia implementasaun seidauk masimu, tanba iha surat tahan deit seidauk implementa ho diak, no espera katak politika Governu nian neebe mak halo rekrutamentu ba Majistradu sira estranjeiru nee atu kompleta no kria kondisaun ida, no too tempu ida implementa ona lei refere.
Iha fatin ketak, Ministru Justisa, Sergio Hornai hatete, Governu planeia atu rekruta Juiz no Defensor Publiku estranjeiru 45 atu reforsa servisu justisa iha Timor Leste.
“Hau fo porsaun pur volta de 45 pesoas, maibe orsida husi Konselhu Superior Majistradu Judisiariu idak-idak, Konselhu Superior Majistradu, Ministeriu Publiku no Konselhu Superior Defensoria Publika mak sei halo politika hodi haree kona-ba ida nee,” dehan MJ, Sergio.
Nia hatutan, rekrutamentu ida nee laos servisu Ministeriu Justisa mesak deit, maibe Ministeriu Justisa sei koordena ho Tribunal, Ministeriu Publiku no Defensoria Publika molok halo rekrutamentu.
(ter)
