DILI, STLTIMORLESTE.com – Konselhu Ministru delibera hodi autoriza Ministra Finansas, Santina José Rodrigues F. Viegas Cardoso atu negosia ho Banku Mundial ba kontratasaun emprestimu ida, liu husi Asosiasaun Internasional Dezenvolvimentu (IDA) neebe destina ba finansiamentu Projetu Abastesimentu Bee iha Kapital Munisipal Baukau (Baucau Municipal Capital Water Supply).
Projetu nee integra iha faze daruak, inisiativa rejional Seguransa no Reziliensia Idriku Banku Mundial nian, ho objetivu atu hasae asesu ba servisu abastesimentu bee neebe jere ho seguru iha area selesionada sira iha Baukau, neebe envolve konstrusaun no operasaun sistema sentralizadu ida neebe reziliente ba mudansa klimatika, ho kapasidade atu benefisia besik ema 37.000 too tinan 2031.
“Ho finansiamentu neebe prevee ho milhaun US$ 30, projetu nee inklui reabilitasaun no espansaun ba fonte no sistema bombajen neebe iha, konstrusaun kaptasaun foun, estasaun bombajen, konduta, instalasaun tratamentu no armazenamentu, inklui mos instalasaun ba ligasaun domestika besik 7.000 ho mikrometria,” haktuir nota komunikadu neebe STL husi governu, Kuarta (12/08/2026).
Imprestimu nee sei finansia mos medida reforsu kapasidade institusional no operasional Bee Timor-Leste (BTL), liu husi asistensia teknika, dezenvolvimentu kapasidade no apoiu ba jestaun no manutensaun infraestrutura. Finansiamentu nee sei fo ho kondisaun altamente konsesional ho periodu karensia tinan 10 no maturidade tinan 40, inklui mos opsaun adiamentu pagamentu iha situasaun emerjensia nasional relasiona ho eventu klimatiku.
Implementasaun nee sei lidera husi Ministeriu Obras Publika liu husi Unidade Jestaun Projetu, no BTL mak.sei responsabiliza ba operasaun no manutensaun infraestrutura hafoin ninia konluzaun.
(alb)
