DILI, STLTIMORLESTE.com – Reitor Dili Institute Of Technology (DIT), Salustiano dos Santos Peidade hatete, edukasaun mak sai xave susesu iha aspeitu vida moris nian no estudante graduadu finalista DIT hamutuk nain 406 simu kofre akademiku iha Knua DIT.
Nia dehan, husi total estudante finalista neebe simu graduasaun ba dala XX iha fulan Novembru tinan 2024, hamutuk ema nain 406, husi total ida nee kompostu husi School of Engineering and Science ema nain 98, School of Petroleum Studies ema nain 27, School of Business and Management ema nain 204, ho School of Tourism and Hospitality ema nain 77, no Programa Mestradu Master of Business Administration ka MBA ema nain.
DIT iha programa estudus ba lisentura hamutuk 11 no programa Masteradu ida no Programa Doutoramentu ida, tanba nee husi nee programa lisensiatura 9 akreditadu ona, no programa rua seluk hetan ona lisensa operasional husi Ministeriu Ensinu Superior Siensias no Kultura. Programa MBA mos hetan ona akreditasun, no Programa Doutoramentu (Ph.D.) iha prosesu atu hetan lisensa operasional. Nee hatudu katak DIT iha kualidade, ho kredibilidade akademiku tomak hodi halo divulgasaun no difuzaun konhesementu no siensia hodi tulun dezenvolve kapasidade joven Timor oan sira.
“Edukasaun mak xave ba susesu iha aspeitu vida moris nian, Edukasaun hanorin ita konaba valores umanu, hanesan kreatividade, emprendedorizmu, toleransia, empatia, no respeitu mutua iha sosiedade divergenti laran, ho edukasaun neebe imi simu tiha ona husi Dili Institute of Technology, imi preparadu hodi hasoru desafiu no oprtunidade iha mundu nebe sempre muda, Imi aprende ona hodi hanoin kritiku, halo inovasaun no halo adaptasaun, neebe sira nee hotu importante tebes hodi atinje susesu iha futuru,” hatete Reitor DIT, Salustiano iu husi diskursu iha ambitu graduasaun DIT, iha knua DIT, Sesta nee (29/11/2024).
Reitor DIT nee hatete, graduadu sira mak jerasaun futuru nasaun Timor Leste nian, imi mak sei sai save ba dezenvolvimentu nasaun nee nian, ho kapasidade no abilidade neebe mak imi hetan ona husi DIT, ho esperansa boot katak imi bele fo kontribusaun real ba dezenvolvimentu nasaun nee. Imi mak ami nia esperensa hodi kria sosiedade ida nebe mais diak liu.
Tanba nee graduadu sira, imi laos deit finaliza no gradua iha loron ohin, maibe imi iha potensia atu sai lideransa iha nasaun ida nee, lideransa laos deit kona-ba pozisaun, maibe mos kona-ba influensia no responsabilidade.
“Espera katak imi bele foti inisiativa iha imi nia komunidade, lidera ho integridade no inspira ema seluk hodi halo diak, fiar katak kada etapa kiik nebe imi halo bele lori impaktu boot ba sosiedade, tanba sosiedade no nasaun hein hela ita boot sira, hanesan Ita nia nain ulun sira sempre dehan, futuru nasaun nee iha imi joven sira nia liman,” dehan nia.
Nia husu ba graduadu sira, komesa husi ohin ba oin imi mak sai ambassador ba Dili Institute of Technology, hatudu valores nebe imi hetan ona husi DIT durante imi nia estuda, iha imi nia asaun no toma desizaun. Sai ezemplu diak iha nebe deit imi hela ba no lori naran diak Instituisaun ida nee ba mundu tomak.
“Parabens ba imi nia susesu, espera susesu sempre akompanha iha imi nia viajen tomak iha futuru. Tanba nee, hatudu ba katak DIT laos boot deit iha naran maibe nia graduadu sira mos iha kualidade hodi kontribui ba dezenvolvimentu nasional no bem estar komum,” hatete Reitor DIT nee.
Entretantu partisipa iha serimonia Graduasaun Lisensiatura ba dala XX no Mestradu ba dala VII husi Reprezentante MESSK, ANAAA nomos familia graduadu sira.
(joa)
