DILI, STLTIMORLESTE.com – Graduadus neebe kada tinan remata estudu iha ensinu superior, balun too agora seidauk hetan servisu.
Hatete Jose Henrique Nunes hanesan graduadu husi UNPAZ, Fakuldade Ekonomia, ba STL iha edifisiu Ministeriu Edukasaun, Segunda nee (10/08/2026).
“Ita hotu hatene katak, ita menus kampu servisu, ita nian graduadus neebe kada tinan remata estudu iha ensinu superior balun too agora seidauk hetan servisu, tanba ita menus kampu trabalhu iha ita nian rai, joven barak sai ba servisu iha ema nian rai hodi bele hadia moris familia nian,” nia informa.
Jose akresenta, oinsa governu bele kria kampu trabalhu ba joven sira iha rai laran, tanba too ohin loron joven barak laiha servisu no barak sai ba servisu iha ema nian rai, tanba iha Timor menus empregu.
Nunee mos Reitor Instituto Ciensia Saude (ICS), Leao Borges dehan, parte ensinu superior sujere ba governu atu kria kondisaun loke kampu trabalhu hodi bele absolve graduadus hirak neebe remata ninia estudu iha universidade.
“Menus empregu iha rai laran nee ita nian governu mak tenke kria kampu trabalhu ba graduadus hirak neebe remata ona sira nian estudu, nee mak ita sujere nafatin governu para bele kria kondisaun, hodi bele absolve ita nian rekursu neebe mak ita produs, tanba ita haree dezempregu iha rai laran nee sei makaas tebes, tanba nee mak ita nian joven barak ba servisu deit iha rai liur,” nia informa.
Nia dehan, tanba realidade iha TL menus kampu trabalhu ba joven sira neebe remata ona estudu iha ensinu superior sira, joven barak sai ba servisu iha rai liur, nee duni joven neebe remata sira nian estudu nee, sira barak agora ba servisu iha rai liur tanba iha rai laran laiha servisu no laiha investimentu boot ruma hodi fo servisu ba joven.
(jac)
