DILI, STLTIMORLESTE.com – Grasa sempre suli ba ema neebe mak fiar iha Nai Jesus Kristu, tanba nee husu sarani hotu nafatin tau konfiansa iha Nai.
Kestaun nee hatoo husi Padre Richardo Pasang, SVD liu husi nia refleksaun ba loron Kuarta (23/10/2024 ) Semana XXIX du Tempu komum Ef 3 : 2 – 12 Luc 12 : 39 – 48 hatete, labele izola aan katak ema ida deit mak matenek ou hetan grasa, maibe grasa sempre suli ba ema hotu neebe fiar iha Kristu.
“Saun Paulo iha primeira leitura fo hanoin ba kristaun sira tomak tantu judeu no mos non-judeu katak esperensia espesial hamutuk ho Maromak iha situasaun saida deit iha moris, la bele halo ita izola aan katak ita mesak mak hetan matenek ka grasa. Paulo hakarak hanorin ba kristaun sira lialos misterio Maromak nian, kmanek ou grasa oi-oin haraik ba ema sira hotu neebe fiar, no sadere ba Jesus Kristu neebe halibur-an nuudar povo ida deit. Misteriu Maromak nee inspira no lori impaktu boot ba nia-an iha ninia ministeriu no misaun nuudar apostolu ba jentiu sira. tanba nee mak fo espiritu atu haklaken Evangelho ba ema hotu,” katak Padre nee.
Saun Paulo dehan, ohin jentiu sira hola parte ona iha liman rohan ida deit, jentiu sira isin lolon ida deit nia liman ain sira simu promesa ida deit iha Kristu Jesus iha evanjelhu.
“Maromak foti hau atu sai Evanjelhu nia atan atu haklaken grasa no presente ba hentiu sira. Nee duni, knaar kristaun agora neebe fiar ba Kristu Jesus mak haklaken misteriu Maromak nian ba ema hotu atu sira bele hetan kmanek husi Maromak. Ho liafuan seluk katak ita tenke sai sasin valores rvanjelhu ba ema hotu iha sira moris,” dehan nia.
Nia dehsn, Paulo iha ninia misaun hatudu mos resposabilidade nuudar apostolu. Tanba nee, iha evanjelhu ohin loron Jesus Kristu fo hanoin ba ema fiar nain sira liu husi aiknanoik atu sira matan moris neon nain kualker tempu tanba Nai neebe ba ema la hatene lolos ninia oras. Susar ba oan Maromak nian neebe Nai hetan sira moris iha sala nia laran. Maibe sira neebe moris ho matan moris neon nain sei hetan premiu ou presente katak Maromak rasik servi no hadomi.
Jesus mos fo hanoin Nia eskolante sira atu fiel no responsabilidade ba knaar no konfiansa neebe Nai haraik ba sira. Se fiel no responsavel Maromak sei haraik konfiansa boot liu tan nuudar presente. Maibe, se la fiel no la responsavel prezente nee lakon.
“Nee duni, Jesus afirma no hametin nafatin Nia eskolante sira atu matan moris neon nain ba fidelidade no responsabilidade ho ita grasa, kmanek no matenek neebe Nai haraik mai ita. Fiel no responsabilidade sei hetan presente maibe la fiel, la hadi-an, la responsavel sei hetan kastigu,” katak Pe.
Bibi atan kreda Katolika nee husu nafatin ba sarani sita hotu nafatin matan moris neon nain tuir buat neebe mak Jesus rasik hanorin ba nia eskolante sira. No husu mos atu nafatin fiel iha responsablidade nunee bele hetan grasa husi Jesus Kristu.
(eme)
