DILI, STLTIMORLESTE.com – Bainhira estudantes sira la kumpri regras mak fo xamada ba inan aman, hodi informa hahalok estudante nian hodi bele hadia ninia mentalidade iha eskola.
“Konaba ida nee, ita uza metodu ida la diak, ita uza fali seluk, tanba metodu oi-oin deit atu uza. Tuir regra neebe estabelese ona husi Ministeriu Edukasaun katak, labele halo violensia ba ita nian estudantes sira, nee duni bainhira ita nian estudante la halo tuir regra ida nee, ita halo xamada ba sira nian inan aman hodi informa hahalok labarik nian hodi hadia ninia mentalidade iha eskola,” dehan Feliciano Gusmão nuudar profesor husi EBC Fatumeta ba STL, Sesta nee (31/07/2026).
Feliciano dehan, bainhira estudantes sira la kumpri nafatin, dalan seluk mak fo karta transferensia ba fali eskola seluk, los duni katak estudantes ida-idak mai ho karakter neebe mak la hanesan, nunee sai edukador presiza uza metodu oi-oin no labele halo violensia ba estudantes sira.
Iha parte seluk, Koordenador EBF no 5 Comoro, Marcelino Moniz dehan, sai profesores presiza pasiensia, tanba hanorin iha EBF nee labarik sira ho idade neebe mak kiik, no sira nian karakter mai la hanesan ida, balun profesor sira koalia sei rona, maibe balun lakohi rona, ida nee hanesan dezafiu neebe sira hasoru.
“Ita sai profesores presiza pasiensia, tanba hanorin iha EBF nee labarik sira ho idade neebe mak kiik, no sira nian karakter mai la hanesan ida, balun profesor sira koalia sei rona, maibe balun lakohi rona, ida nee hanesan dezafiu neebe sira hasoru, maibe hanesan profesores prontu simu situasaun saida deit, buat hotu tenke pasiensia mak barak, atu nunee buat hotu bele lao ho diak,” nia esplika.
Nunee mos Koordenador EBF Fatumeta, Jose Manuel Guterres, Ensinu Baziku Filial (EBF) Fatumeta sempre fo hanoin ba manorin sira, bainhira hanorin estudantes sira tenke pasiensia ho fuan boot, tanba labarik sira mai ho karakter neebe mak la hanesan.
“Defikuldade seluk neebe mak ami infrenta mak ita nian estudantes sira nakar nee, tanba agora ema bandu labele baku, nee hanesan dezafiu boot ida, nee mak ita nian profesores sira durante nee infrenta, liu-liu ita nian profesores neebe mak hanorin iha sala laran. Atu solusiona problema nee mak primeiru ita nian profesores neebe mak hanorin estudantes sira nee tenke ho fuan neebe mak boot, hakarak ka lakohi ida nee tenke adapta,” afirma.
Tanba tuir Jose, nuudar direjente ida husi eskola nee, nafatin husu ba profesores sira tenke pasiensia no fuan boot, tanba kada estudantes idak-idak mai ho karakter neebe mak la hanesan, balun la nakar no balun mak nakar, nunee sai manorin nee tenke fuan boot atu hasoru dezafiu hotu, hodi buka solusaun ba problema hirak nee.
“Sekuandu la pasiensia nee labele, tanba estudantes sira iha EBF nee mai ho idade neebe mak kiik, sira nian hanoin mak mai nakar no halo tun sae deit, nee labele, tanba nee presiza pasiensia, no fo hanoin ba estudantes sira labele nakar, mai eskola para atu aprende, maibe labarik kiik hotu deit, ita mak pasiensia,” nia informa.
Nia informa, estudantes sira dala ruma profesores sira hamriik iha oin hanorin sira, balun tur no balun hamriik, maibe oinsa mak profesores sira buka meus nafatin, husu estudantes sira nee tur hakmatek para bele tuir prosesu ensinu aprendizajen husi profesor sira, tanba kada sala estudantes ho kuantidade neebe boot, manorin sira sempre hasoru dezafiu ida nee.
“Ita nian estudantes sira nakar, ita tenke buka meus para koalia ho sira, katak mai iha eskola nee atu hakerek no aprende, tur iha sala hakmatek hodi rona profesores neebe hanorin iha oin, atu nunee labarik sira nee bele tur hakmatek iha sala hodi rona ita, se lae sai dazafiu boot ida mai ita profesor sira,” tenik nia.
(jac)
