DILI, STLTIMORLESTE.com – Primeiru Ministru Singapura, Lawrence Wong hateten, iha tinan 2027, Singapura hahu fo oportunidade ba Timoroan atu servisu iha Singapura.
Lia hirak nee Primeiru Ministru Singapura, Lawrence Wong deklara hafoin remata enkontru bilateral ho Primeiru Ministru (PM), Kay Rala Xanana Gusmão, iha Palasiu Governu, Sesta (03/07/2026).
“Tinan oin, Singapura mos sei loke setor no profisaun balun ba trabalhador Timoroan sira atu bele servisu iha Singapura. Ida nee sei loke oportunidade foun ba povu Timor Leste no hametin tan relasaun negosiu no povu-ba-povu,” hatete PM Lawrence Wong.
Nia hatutan, Singapura laos loke deit oportunidade ba Timoroan atu servisu iha Singapura, maibe sei fo mos bolsu estudu ba Timoroan sira iha area hanesan saude no edukasaun nian.
“Ba nasaun kiik hanesan ita, ema mak rekursu importante liu. Tanba nee, ami sei aprofunda kooperasaun iha area saude atu hametin kapasidade no dezenvolve forsa trabalhu, no ami mos sei servisu hamutuk iha area edukasaun hodi apoia Institutu Nasional Formasaun Profesor no Edukador sira atu dezenvolve lideransa eskolar neebe bele prepara jerasaun foun,” dehan PM Singapura.
Iha fatin hanesan, Primeiru Ministru Kay Rala Xanana Gusmão agradese tebes ba Primeiru Ministru Lawrence Wong, tanba bele fo oportunidade ba Timoroan sira atu servisu iha Singapura.
“Ida nee deklarasaun importante ida neebe Primeiru Ministru Wong hatoo ohin loron. Ida nee marka dezenvolvimentu signifikativu ida iha relasaun entre ita nia nasaun rua.
Ida nee mos hatudu konfiansa boot ba povu Timoroan,” Agradese PM Xanana.
PM Xanana afirma, husi dezafiu boot iha dezenvolvimentu nasaun mak rekursu umanu, tan nee liu husi oportunidade sira hanesan nee Timoroan sira bele hasae liu tan sira nia konhesimentu
“Permite Timoroan sira atu servisu iha Singapura sei fo sira treinamentu, kapasidade, esperiensia no bele hametin sira nia karakter. Ida nee sai importante bainhira sira fila fali ba Timor Leste,” dehan nia.
Nia mos dehan, liu husi oportunidade sira hanesan nee sei fo rendimentu ba Timoroan sira no sira nia familia. Tanba iha tinan 2025 deit, remesa husi Timoroan sira neebe servisu iha rai liur atinje liu milhaun UU$ 180, neebe hanesan ho 10% husi PIB.
“Ida nee hatudu kontribuisaun importante husi trabalhador Timoroan sira ba sira nia familia no ekonomia nasional,” esplika nia.
(alb)
