DILI, STLTIMORLESTE.com – Eskola Baziku Filial (EBF) Naroman kontinua halo aproximasaun ba estudantes sira, tanba kada estudante mai ho karakter no situasaun familiar ne’ebé diferente.
Kordenadora EBF Naroman, Joana Teresa Freitas, hatete ba STL iha nia fatin servisu, Tersa-feira (22/09/2026), katak estudantes sira iha idade ki’ik no mai husi família ho situasaun diferente, nune’e sira mos iha karakter ne’ebé la hanesan.
“Ita hatene katak estudantes sira iha EBF ne’e ho idade ne’ebé ki’ik, sira mai husi família ne’ebé diferente, entaun sira mai ho karakter oioin. Maibé, professor sira nia knaar ida ne’e hanesan vokasaun espesial ida. Professor ida-idak presiza mantein nia pozisaun hodi bele identifika estudante sira mai husi família oinsá,” nia dehan.
Joana hateten katak, dala ruma estudante sira la tau atensaun ba orientasaun husi professor sira no halo buat ne’ebé professor sira bandu. Tanba ne’e, professor sira presiza iha pasiénsia no kontinua halo aproximasaun ba estudantes.
Nia hatutan katak, estudante sira ne’ebé hasoru dificuldade oioin presiza hetan atensaun, hodi sira bele hakbesik an nafatin ba eskola no kontinua partisipa iha prosesu ensinu-aprendizajen.
“Labele ignora sira iha kotuk, tenke tau atensaun. Ami nia professor sira sempre uza maneira ida ne’e, nune’e estudantes sira kada loron mai partisipa iha aula. Tanba estudantes hirak ne’e mai ho karakter ne’ebé la hanesan, ita presiza hanorin ho maneira oioin,” nia informa.
Iha fatin seluk, Kordenadora EBF Vila-Verde, Josefina Maia, hatete katak estudantes sira iha idade ki’ik, nune’e professor sira buka maneira apropriadu hodi bele halo sira partisipa iha aula no rona esplikasaun husi professor.
“Ita nia estudantes iha EBF ne’e mai ho idade ne’ebé ki’ik, ita nia professor sira mak hanorin sira ho maneira oinsá, para ita nia estudantes sira bele rona professor sira halo esplikasaun,” nia dehan.
(jac)
