DILI, STLTIMORLESTE.com – Importante estabelese sentru juvenil, maibe tenke halo lejislasaun foun ida define konaba Sentru Juvenil.
“Hau nia hanoin sentru juvenil nee importante ba minoridade sira neebe pratika krime, maibe molok guvernu harii sentru juvenil, guvernu mak tenki halo uluk lejislasaun espesial ida hodi define konaba ezistensia sentru nee rasik, ho nia karateristika medida sira nee,” dehan Jurista Sergio Dias Quintas ba STL iha Kaikoli Dili, Tersa (30/06/2026).
Tuir Sergio, sentru juvenil diferensia ho prizaun, tanba sentru juvenil nee akomula labarik sira neebe ho karakteristika medida edukativa, laos hanesan prizaun ho karateristika medida punitiva.
Nia sublina, sentru juvenil mai ho nia objetivu propriu atu eduka labarik molok fila hikas hodi reintegra ba familia no sosiedade.
Iha fatin ketak, Akademiku UNTL, Rafael de Jesus dehan, tempu ona atu harii sentru juvenil, hodi asegura minoridade sira atu labele akontese tan krime foun.
“Importante estabelese sentru juvenil, tanba ohin loron minoridade balu komete krime maibe Tribunal tenke liberta sira tanba deit sira nia idade sei kiik,” dehan nia.
Nia esplika, sentru juvenil tenke harii sedu, tanba sentru juvenil iha ona bele halo prevensaun atu minoridade sira labele komete krime. Se sentru refere seidauk iha bele fo espasu ba iha minoridade komete krime.
Nia husu inan aman sira atu kontrola oan sira, hodi labele komete aktu krime, tanba moral menus husi inan aman sai mos kauza ida hodi fasil ba minoridade komete krime.
Aleinde nee, Ministru Justisa, Sergio Hornai deklara katak, fatin atu harii sentru Juvenil iha Tibar, tanba daudaun nee nia prosesu sei lao hela.
Tuir Ministru, sentru juvenil akomula minoridade neebe pratika krime, atu nunee iha formasaun ketak ba sira hodi sira sai husi fatin refere bele halo transformasaun ba sira nia aktu atu labele komete tan krime.
(ter)
