BAUKAU, STLTIMORLESTE.com – Negosiante balun kontinua halo negosiu iha merkadu Vila Antiga, tanba hetan orientasaun husi Autoridade Postu Administrativu Baukau Vila.
Informasaun neebe antes STL rekolha iha terenu Autoridade Munisipiu Baukau liu husi ekipa konjunta, iha loron 04 Dezembru 2024 muda ona negosiante hamutuk 52 iha merkadu Vila Antiga liu husi sobu baraka neebe negosiante sira harii hodi tula ba transporte koloka iha merkadu foun Tuanau.
Maibe daudaun negosiante sira kontinua halo atividade negosiu iha merkadu Vila Antiga neebe bandu ona husi ekipa konjunta liu husi estabelese dada police line iha merkadu tuan refere.
“Ami faan iha nee camat mak dehan, sementara faan iha nee lai, tanba fatin iha neeba laiha, se fatin iha ona ami prontu muda,” hateten Xefe Negosiante Vila Antiga, Celestino Gonçalves Gama ba jornalista sira iha merkadu Vila Antiga, Baukau, Kuarta (09/04/2025).
Negosiante nee katak, planu Autoridade Munisipiu muda merkadu hanesan sidadaun prontu koopera hodi muda ba merkadu Tuanau no konsege muda ona ba merkadu Tuanau, maibe laiha fatin ba negosiante Vila Antiga, nunee hetan orientasaun husi Administrador Postu Baukau Vila kontinua faan iha merkadu tuan ho provizoriu hodi hein prosesu preparasaun kondisaun merkadu husi Autoridade Munisipiu.
Nia konfesa, durante halo negosiu iha merkadu Tuanau la hetan rendimentu diak, tanba kada loron hetan rendimentu masimu too US$ 7.00, tanba laiha kompradores, maibe faan hikas iha merkadu Vila Antiga hetan rendimentu diak, tanba merkadu besik komunidade hodi kompra sasan.
Celestino argumenta, desizaun koloka provizoriu negosiante iha merkadu tuan Vila Antiga nee diak, tanba hetan rendimentu, maibe triste, tanba fo impaktu ba negosiante iha merkadu Tuanau la hetan rendimentu, tanba kompradores prefere liu merkadu besik no lakohi lao dook tanba deit modo futun ida.
“Ami prontu koopera ho Estadu, maibe tenke tau ami iha fatin dignu,” negosiante nee promete.
Administrador Postu Administrativu Baukau Vila, Aires de Fatima Correia rekonhese, nia parte mak orienta negosiante Vila Antiga kontinua faan iha merkadu Vila Antiga, tanba observasaun ba kondisaun iha merkadu Tuanau laiha fatin ba negosiante Vila Antiga atu halo negosiu.
“Kestaun laos dehan hau mak hatete netik labele sae ba, maibe fatin hau haree rasik ho matan, laiha kondisaun, nee mak hau hateten, labele sae ba lai, maibe kondisaun diak mak hau lori sae ba,” hateten Aires.
Dezisaun muda negosiante sira husi merkadu tuan husi Vila Antiga, Beskem no Vila Nova husi Autoridade Munisipiu Baukau, ezekuta husi ekipa konjunta, maibe Autoridade Postu Baukau Vila foti inisiativa orienta negosiante Vila Antiga kontinua faan iha merkadu Vila Antiga, tanba kestaun umanu.
“Hau atu koalia la kontra mos lae, atu dehan kontra mos hau lae, maibe hau haree liu parte umanu, tanba hau lakohi problema ita ba tuir rezolve, maibe fatin diak iha tiha lai hau prontu haruka sira sae ba,” Aires argumenta.
Nia katak, responsabilidade Autoridade Postu atu asegura negosiante sira nia preokupasaun no kooperasaun iha prosesu muda merkadu no durante prosesu muda merkadu negosiante koopera, maibe falta kondisaun iha merkadu Tuanau.
Nunee linha koordenasaun entre Autoridade Postu Baukau Vila no Jestaun Merkadu Munisipiu Baukau kontinua lao no hein ba prosesu ateru fatin iha merkadu Tuanau hodi koloka negosiante Vila Antiga.
Hatan ba kestaun nee, Diretor Servisu Jestaun Merkadu Munisipiu Baukau, Jerónimo Freitas hateten, planu ateru fatin ba negosiante Vila Antiga, parte Jestaun Merkadu aprezenta ona ba Diresaun Planu Dezentendimentu Integradu Munisipal no Servisu Obras Publikas Munisipal no sei solusiona, nunee tempu besik bele koloka ona negosiante Vila Antiga ba merkadu Tuanau.
Entretantu negosiante Vila Antiga neebe daudaun kontinua halo negosiu iha merkadu Vila Antiga hamutuk 57.
(tom)
