DILI, STLTIMORLESTE.com – Servisu Edukasaun Munisípiu Bobonaro iha ona planu atu halo rezidénsia ba profesór sira, maibé konstrusaun nee sei konsidera atu hala’o iha tinan 2027.
Diretor Servisu Edukasaun Munisípiu Bobonaru, Miguel Freitas, hato’o informasaun ne’e ba STL liu husi telefone, Sesta (18/09/2026).
“Konaba rezidénsia ba ita nia profesór sira, agora iha ona planu atu bele halo iha tinan oin 2027. Tanba agora PNDS mos ajuda ba konstrusaun kuziña no edifísiu, maibé konaba rezidénsia ba profesór sira, dala ruma sei halo iha tinan 2027,” dehan nia.
Tuir Miguel, to’o agora seidauk iha rezidénsia espesífika ba profesór sira, nune’e profesór balun aluga uma iha komunidade hodi bele hala’o knar iha eskola ne’ebé Ministériu Edukasaun koloka sira.
“Nia númeru nee hau ladún lembra didi’ak, kona-ba profesór hira mak aluga uma no hira mak la aluga. Maibé ba profesór sira nee, seidauk iha rezidénsia. Sira nia atividade ensinu no aprendizajen iha eskola lao hanesan baibain. Eskola sira iha área remota balun besik malu, no balun dok,” nia haktuir.
Nia informa katak, profesór sira ne’ebé mai liu husi programa bolsa kandidatu profesór, antes nee Ministériu Edukasaun koloka ona sira ba eskola ne’ebé sira sei hanorin. Tanba nee, konsidera nesesidade rezidénsia ka hela-fatin ba profesór sira, no hein katak planu nee bele hala’o iha tinan oin.
Iha fatin seluk, Diretor Servisu Edukasaun Munisípiu Likisá, Julio da Silva, dehan rezidénsia ba profesór sira mos seidauk iha, nune’e profesór sira aluga uma komunidade nian.
“Ita nia profesór sira seidauk iha rezidénsia ba sira, nune’e sira aluga komunidade sira nia uma. Kona-ba hira mak aluga no la aluga, ita presiza haree dadus nee. Maibé atividade iha eskola sira lao hanesan baibain,” nia afirma.
Entretantu, Diretor Nasionál Rekursu Umanu iha Ministériu Edukasaun, Joao Amaral, seidauk bele fó resposta kona-ba asuntu rezidénsia ba profesór sira tanba okupadu ho servisu.
“Agora hau seidauk bele halo entrevista ho ita boot sira, tanba hau sei okupadu ho servisu. Husu iha tempu ne’ebé mai atu halo entrevista,” nia esplika.
(jac)
