DILI, STLTIMORLESTE.com – Prezidente Republika (PR) Jose Ramos Horta husu entidade hotu atu halo protesaun ba labarik no feto sira, nunee hadook aan husi kazu Violensia Domestika (VD).
Prezidente Republika Jose Ramos Horta hatoo kestaun nee ba Jornalista bainhira remata halo inaugurasaun ba edifisiu foun ADB iha Farol, Dili, Tersa (21/04/2026). Nia husu Governu liu husi Sekretariu Estadu ba Igualdade (SEI) nomos organizasaun neebe luta ba direitu feto atu luta makaas hodi halo prevensaun ba kazu violensia domestika hasoru feto no labarik iha Timor Leste.
“Buat neebe prioridade numeru 1 kuandu ita rona hetan vitimasira nee fo protesaun ba sira fo uma mahon ba sira, buka meius hotu hotu para sira bele rekopera bele estuda ba oin justisa tenke lao ba oin maibe nee justisa nia knaar SEI, MJ, PJR sira hotu hotu mak tenke haree aspeitu punisaun julgamentu ba sira neebe komete krime sira nee,” dehan Preziente Republika.
Prezidente Republika hatete prioridade numeru um tau matan balabarik sira nee, maibe dala ruma tribunal julgamentu todan maibe prioridade numeru 1 ida iha Timor haree oinsa protesaun makaas liu ba kualker kiik oan sira, labarik no feto hapara hamate violensia domestika no abuju sira nee.
“Timor haree oinsa protesaun makaas liu ba kualker kiik oansira, labarik no feto hapara hamate violensia domestika no abuzu sira nee. Nee liu mos husi empoderamentu ekonomiko, se feto defende ba laen laiha serbisu ou serbisu manan osan kiik los nee laen bele baku violensia maibe feto lakohi halai husi uma tanba laiha protesaun no iha oan barak,” katak PR Horta.
Xefe Estadu hatete maske feto barak hasoru violensia domestika husi laen sira maibe sira hili dalan nonok tanba ekonomia depende liu ba mane ou laen sira no oan barak tanba nee sira hili nonok iha uma maske hasoru violensia domestika.
Tanba nee Prezidente Republika husu entidade estadu husi lina Ministeriu oin oin hamutuk ho organizasaun neebe mak luta ba direitu feto no labarik nafatin halo advokasia oinsa bele kombate kazu violensia domestika iha familia hasoru feto no labarik.*
(eme)
